ტეილორ სვიფტმა კიდევ ერთხელ დაწერა ისტორია. 36 წლის სუპერვარსკვლავი სიმღერების ავტორთა დიდების დარბაზს შეუერთდა. ამდენად, გრემის 14-გზის მფლობელი სვიფტი ისტორიაში ყველაზე ახალგაზრდა ქალი გახდა, რომელსაც ეს პატივი ხვდა წილად. 21 იანვარს ცნობილი გახდა, რომ სიმღერების ავტორთა დიდების დარბაზში წელს ასევე მოხვდნენ როკჯგუფ Kiss-ის წევრები პოლ სტენლი და ჯინ სიმონსი, მერაია ქერისთან თანამშრომლობით ცნობილი უოლტერ აფანასიევი, ალანის მორისეტი და სხვები.

"მუსიკალური ინდუსტრია დგას იმ ავტორების არაჩვეულებრივ ნიჭზე, რომლებიც დაუვიწყარ სიმღერებს ქმნიან", — ნათქვამია სიმღერების ავტორთა დიდების დარბაზის პრესრელიზში, — "მათი არტისტიზმის გარეშე, ვერც ჩანაწერები ვერ იარსებებდა, ვერც — კონცერტები და ვერც — გულშემატკივართა არმიები. ყველაფერი სწორედ სიმღერიდან და მისი შემქმნელიდან იწყება. სიამაყით ვაგრძელებთ ისტორიაში კულტურულად ყველაზე მნიშვნელოვან კომპოზიტორთა აღნიშვნას".

სიმღერების ავტორთა დიდების დარბაზი (Songwriters Hall of Fame) 1969 წელს შეიქმნა და ბოლო ნახევარი საუკუნის განმავლობაში 500-მდე მუსიკოსს მოუყარა თავი, მათ შორის, ისეთ ლეგენდარულ ვარსკვლავებს, როგორებიც არიან სტივი უონდერი, ჯონ ლენონი, ელტონ ჯონი, შარლ აზნავური, დევიდ ბოუი, ჯონ ბონ ჯოვი, ბობ მარლი და ლეონარდ კოენი.

"თანამედროვე მუსიკის ისტორიაში, ძალიან ცოტამ თუ მოახერხა, ტეილორ სვიფტის მსგავსად შეექმნა ჰიტები ამდენი ხნის განმავლობაში. წელს იგი თავისი პირველი ჩანაწერის გამოსვლიდან 20 წლის იუბილეს აღნიშნავს", — ვკითხულობთ დიდების დარბაზის ვებგვერდზე, — "სვიფტის, როგორც სიმღერების ავტორის, სუპერძალა მისი გარდასახვის უნარია: სხვადასხვა ჟღერადობის მუსიკის მოცვა და რამდენიმე ჟანრში ერთნაირი თავდაჯერებით მუშაობა. მისი არტისტიზმი გამბედაობითა და შეუპოვრობითაა განმსჭვალული, იგი არ უშინდება სიახლეებს, იმის მიუხედავად, რომ ზოგჯერ ყველაზე პრაგმატულ შემდეგ ნაბიჯად შეიძლება ჩაითვალოს იმ ხაზის გაგრძელება, რომელმაც წარმატება მოგიტანა".

ნოემბერში, როცა ცნობილი გახდა, რომ ტეილორი დიდების დარბაზზე იყო ნომინირებული, გავიგეთ ის ხუთი სიმღერაც, რომელიც მან ამ სტატუსის მოსაპოვებლად წარადგინა: All Too Well (10-წუთიანი ვერსია), Blank Space, Anti-Hero, Love Story და The Last Great American Dynasty.

სანამ ტეილორისთვის 2026 ასეთი წარმატებით დაიწყებოდა, მუსიკოსს შარშან ბრწყინვალე წელი ჰქონდა: ჯერ სრულად დაიბრუნა საავტორო უფლებები თავის პირველ ალბომებზე, მერე დაინიშნა (ამერიკული ფეხბურთის ვარსკვლავ ტრევის კელსიზე), ბოლოს კი რიგით მე-12 სტუდიური ალბომი The Life of a Showgirl გამოუშვა, რომელიც გამოსვლისთანავე მსოფლიო სენსაციად იქცა და არაერთი რეკორდი მოხსნა, სრულად მოიცვა ჩარტების მოწინავე პოზიციები და პირველივე თვეში სპოტიფაიზე 2 მილიარდზე მეტი სტრიმი მოაგროვა.

სვიფტის, როგორც სიმღერების ავტორის, განსაკუთრებულ ნიჭზე აქამდეც არაერთხელ გაუმახვილებიათ ყურადღება. გარდა ჟანრობრივი და სტილისტური მრავალფეროვნებისა, მის სიმღერებს პოეტური ტექსტებიც გამოარჩევს: ცნობილმა ინგლისელმა შექსპიროლოგმა სერ ჯონათან ბეიტმა ტეილორს "ლიტერატურის ბუმბერაზიც" კი უწოდა, კემბრიჯში კი ლათინური ენის შემსწავლელებს სვიფტის სიმღერების გამოყენება ურჩიეს.