აშშ-ის სახელმწიფო დეპარტამენტი 75 ქვეყნის მოქალაქეებისთვის, მათ შორის, ქართველებისთვის საემიგრაციო ვიზების დამუშავებას აჩერებს, იმ მიზნით, რომ გაამკაცროს კონტროლი იმ განმცხადებლებზე, რომლებიც შესაძლოა მომავალში "სახელმწიფო ვალდებულებად" (public charge) იქცნენ. ამის შესახებ ინფორმაციას Fox News ავრცელებს.

სახელმწიფო დეპარტამენტის მემორანდუმის მიხედვით, რომელიც პირველად Fox News Digital-მა გაავრცელა, საკონსულოს ოფიცრებს არსებული კანონის საფუძველზე ვიზებზე უარის თქმა ევალებათ, სანამ დეპარტამენტი ხელახლა შეაფასებს სკრინინგის და შემოწმების პროცედურებს.

ვიზების დამუშავების შეჩერება 21 იანვრიდან დაიწყება და განუსაზღვრელი ვადით გაგრძელდება, ვიდრე სახელმწიფო დეპარტამენტი იმიგრაციული პროცესების გადახედვას არ დაასრულებს.

"სახელმწიფო დეპარტამენტი გამოიყენებს თავის მრავალწლიან უფლებამოსილებას, რათა არ დაუშვას პოტენციური იმიგრანტები, რომლებიც "სახელწიფო ვალდებულება" გახდებიან შეერთებული შტატებისთვის და ბოროტად გამოიყენებენ ამერიკელი ხალხის კეთილშობილებას," — განაცხადა სახელმწიფო დეპარტამენტის პრესსპიკერმა ტომი პიგოტმა.

ქვეყნების სია, რომლებსაც შზღუდვა შეეხებათ ასეთია: ავღანეთი, ალბანეთი, ალჟირი, ანტიგუა და ბარბუდა, სომხეთი, აზერბაიჯანი, ბაჰამის კუნძულები, ბანგლადეში, ბარბადოსი, ბელარუსი, ბელიზი, ბჰუტანი, ბოსნია, ბრაზილია, ბირმა, კამბოჯა, კამერუნი, კაბო-ვერდე, კოლუმბია, კოტ-დ’ივუარი, კუბა, კონგოს დემოკრატიული რესპუბლიკა, დომინიკა, ეგვიპტე, ერიტრია, ეთიოპია, ფიჯი, გამბია, საქართველო, განა, გრენადა, გვატემალა, გვინეა, ჰაიტი, ირანი, ერაყი, იამაიკა, იორდანია, ყაზახეთი, კოსოვო, ქუვეითი, ყირგიზეთი, ლაოსი, ლიბანი, ლიბერია, ლიბია, მაკედონია, მოლდოვა, მონღოლეთი, მონტენეგრო, მაროკო, ნეპალი, ნიკარაგუა, ნიგერია, პაკისტანი, კონგოს რესპუბლიკა, რუსეთი, რუანდა, სენტ-კიტსი და ნევისი, სენტ-ლუსია, სენტ-ვინსენტი და გრენადინები, სენეგალი, სიერა-ლეონე, სომალი, სამხრეთ სუდანი, სუდანი, სირია, ტანზანია, ტაილანდი, ტოგო, ტუნისი, უგანდა, ურუგვაი, უზბეკეთი და იემენი.

FoX News წერს, რომ იმიგრაციისა და მოქალაქეობის შესახებ კანონი (Immigration and Nationality Act) საკონსულოს ოფიცრებს დიდი ხანია აძლევს უფლებას, განმცხადებლები "სახელმწიფო ვალდებულების" საფუძვლით დაუშვებლად ცნონ. თუმცა, პრეზიდენტმა დონალდ ტრამპმა 2019 წელს ამ ცნების განმარტება გააფართოვა და მასში სოციალური სარგებლის უფრო ფართო სპექტრი ჩართო. ეს ცვლილებები სასამართლოში გასაჩივრდა, ნაწილობრივ დაიბლოკა და საბოლოოდ ბაიდენის ადმინისტრაციის მიერ გაუქმდა.