ეროვნული ბანკის პრეზიდენტი ნათია თურნავა ბრიტანეთის და აშშ-ის მიერ რუსული ნავთობკომპანია "ლუკოილისთვის" სანქციების დაწესებას გამოეხმაურა.

თურნავამ თქვა, რომ "იმოქმედებენ შესაბამისად".

"თქვენ იცით, რომ საერთაშორისო სანქციების რეჟიმების შემოღების დღიდან, ჩვენი საფინანსო სექტორი განუხრელად ასრულებს საერთაშორისო სანქციებს. უკვე სამი წელია, პრაქტიკულად, ჩვენ არცერთი დარღვევის შემთხვევა არ გვქონია. ამ კონკრეტულ შემთხვევაშიც, ეს შედარებით ახალი გადაწყვეტილებაა, ჩვენი საფინანსო სექტორი და რეგულატორიც, ჩვენც ვიმოქმედებთ შესაბამისად. შევისწავლით, ვნახავთ და რასაკვირველია, სანქციების რეჟიმის დაცვა არის ის, რასაც აკეთებენ ჩვენი ბანკები დღემდე. ამ თვალსაზრისით რაიმე გართულება არ იქნება", — განაცხადა ნათია თურნავამ.

აშშ-ის ფინანსთა სამინისტროს უცხოური აქტივების კონტროლის ოფისმა (OFAC) დამატებითი სანქციები დააწესა რუსეთს "სამშვიდობო პროცესში სერიოზული ინტერესის არარსებობის" გამო.

ამას გარდა, დიდი ბრიტანეთის ხელისუფლებამ 15 ოქტომბერს სანქციები დააწესა რუსული კომპანიების, "ლუკოილისა" და "როსნეფტის" წინააღმდეგ.

ცნობისათვის, ყულევის ნავსადგურმა "რუსნეფტისგან" 100 000 ტონაზე მეტი ნედლი ნავთობი მიიღო.