რუსულმა კომპანია "რუსნეფტმა" (RNFT.MM) მიმდინარე თვეში ნავთობის პირველი ტვირთი მიაწოდა საქართველოში ახლად აშენებულ ყულევის ნავთობგადამამუშავებელ ქარხანას. ამის შესახებ ინფორმაცია Reuters-მა გაავრცელა

სააგენტო წერს, რომ რუსეთსა და საქართველოს ფორმალური დიპლომატიური ურთიერთობები 2008 წლიდან არ აქვთ, როდესაც ისინი მოსკოვის მიერ მხარდაჭერილი სეპარატისტული რეგიონების, სამხრეთ ოსეთისა და აფხაზეთის გამო ხანმოკლე ომს აწარმოებდნენ. თუმცა, მმართველი პარტია "ქართული ოცნების" დროს თბილისმა გააღრმავა ეკონომიკური კავშირები რუსეთთან, მაშინ როცა დასავლეთის ქვეყნებთან ურთიერთობები მკვეთრად გაუარესდა.

ტანკერმა KAYSERI-მა 6 ოქტომბერს რუსეთის შავი ზღვის პორტ ნოვოროსიისკიდან ყულევის ნავთობტერმინალში 105,340 ტონა ნავთობი შემოიტანა. როგორც Reuters წერს, ამ საკითხზე "რუსნეფტს" კომენტარი არ გაუკეთებია.

"რუსეთი ცდილობს ექსპორტის დივერსიფიკაციას, ამავდროულად, უკრაინის გამო დასავლეთის სანქციებით გამოწვეულ პრობლემებს ებრძვის.

პირველი ნავთობგადამამუშავებელი ქარხნით საქართველო ცდილობს შეამციროს დამოკიდებულება რუსეთიდან, თურქეთიდან, აზერბაიჯანიდან, რუმინეთიდან და ყაზახეთიდან საწვავის იმპორტზე", ­ — წერს Reuters.

ფინანსთა სამინისტროს შემოსავლების სამსახურის ცნობით, ყულევის საზღვაო ნავსადგურში რუსეთის ფედერაციის პორტიდან შემოსულ, პანამის დროშის ქვეშ მცურავ თბომავალ KAYSER-ზე, გემის მფლობელ კომპანიასა და ტვირთის გამომგზავნ და მიმღებ კომპანიებზე საერთაშორისო სანქციები არ ვრცელდება.

მათი ცნობით, საბაჟო კონტროლის პროცედურების განხორციელების მიზნით ტვირთი ჩამოიცალა დროებითი შენახვის საბაჟო საწყობში.

"საქართველოს ფინანსთა სამინისტროს შემოსავლების სამსახური მაღალი საჯარო ინტერესიდან გამომდინარე, საჭიროდ თვლის განცხადება გააკეთოს ყულევის ნავსადგურში შემოსულ პანამის დროშის ქვეშ მცურავ გემთან და ტვირთთან დაკავშირებით.

მიმდინარე წლის 2 ოქტომბერს, ყულევის საზღვაო ნავსადგურში რუსეთის ფედერაციის პორტიდან შემოვიდა პანამის დროშის ქვეშ მცურავი თბომავალი KAYSERI, რომელზეც დატვირთული იყო ერთ-ერთი რუსული კომპანიიდან (უწყება თავს იკავებს კომპანიების სახელწოდებების დასახელებისგან და საგადასახადო საიდუმლოების შემცველი ინფორმაციის გავრცელებისგან) გამოგზავნილი, იმპორტის საბაჟო პროცედურებში მოქცევისთვის განკუთვნილი 100 000 ტონამდე ნედლი ნავთობი.

საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოსა და შემოსავლების სამსახურის მიერ განხორციელებული შემოწმების შედეგად, დადასტურებულია, რომ გემსა და გემის მფლობელ კომპანიაზე, ასევე ტვირთის გამომგზავნ და მიმღებ კომპანიებზე არ ვრცელდება საერთაშორისო სანქციები (ინფორმაცია ხელმისაწვდომია ღია წყაროებით). აღნიშნულიდან გამომდინარე, შემდგომი საბაჟო კონტროლის პროცედურების განხორციელების მიზნით ტვირთი ჩამოიცალა დროებითი შენახვის საბაჟო საწყობში", — ნათქვამია გავრცელებულ ინფორმაციაში.

ყულევის ნავსადგურმა ოპერირება მიმდინარე თვეში დაიწყო, საწყისი გადამუშავების სიმძლავრით წელიწადში დაახლოებით 1.2 მლნ ტონა ნავთობია, ანუ დღეში დაახლოებით 24 000 ბარელი. ის თანდათან გაზრდის თავის წლიურ სიმძლავრეს 4 მლნ ტონამდე 2028 წელს და მიზნად ისახავს საწვავის მიწოდებას როგორც ექსპორტისთვის, ასევე შიდა ბაზრისთვის.