რუსეთის ტყვეობაში მყოფი აზოვის მცველის, მამუკა გაწერელიას დედა, დალი ჩხეიძე აშშ-ის პირველ ლედის, მელანია ტრამპს ღია წერილით მიმართავს და დატყვევებული შვილის სამართლიანობისთვის ბრძოლაში დახმარებას სთხოვს.

დალი ჩხეიძე აშშ-ის პირველ ლედის მოუწოდებს თანაგრძნობა გამოიჩინოს და მამუკა გაწერელიას ბედის შესახებ ცნობიერების ამაღლებაში დაეხმაროს.

"გწერთ, როგორც გულგატეხილი დედა. ჩემი შვილი, მამუკა გაწერელია, 2022 წელს უკრაინაში, აზოვსტალში მომხდარი ტრაგიკული მოვლენების დროს ტყვედ ჩავარდა. ტყვეობაში ტანჯვის შემდეგ, მას სამუდამო პატიმრობა მიესაჯა. ეს სასჯელი აუტანელი და უსამართლოა.

მის გარეშე ყოველი დღე ტკივილით არის სავსე და იმის ცოდნა, რომ ის შეიძლება აღარასდროს დაბრუნდეს სახლში, ჩვენს ოჯახს ანგრევს. მოგიწოდებთ, როგორც თავად დედას, გამოიჩინოთ თანაგრძნობა და დაგვეხმაროთ ჩემი შვილის ბედის შესახებ ცნობიერების ამაღლებაში. თქვენი ხმა გავლენიანია და შეუძლია იმედი მოიტანოს იქ, სადაც თითქმის აღარაფერი დარჩა.

გთხოვთ, დაგვეხმარეთ მამუკას სამართლიანობისთვის ბრძოლაში. დედის გული არასდროს წყვეტს ლოდინს და მე არასდროს შევწყვეტ ლოცვას მისი თავისუფლებისთვის.

ღრმა პატივისცემითა და იმედით, დალი ჩხეიძე", — წერია წერილში.

ცნობისთვის, უკრაინაში, რუსეთის წინააღმდეგ მებრძოლს, აფხაზეთიდან დევნილ 24 წლის მამუკა გაწერელიას პუტინის რეჟიმმა უვადო პატიმრობა მიუსაჯა. ახალგაზრდა კაცი ტყვედ 2022 წლის 20 მაისს ჩავარდა.

რუსეთში უვადო პატიმრობა მისჯილი ქართველი მებრძოლის ოჯახი უკრაინის და საქართველოს ხელისუფლებას დახმარებას თითქმის 3 წელია სთხოვს.