მოკლედ: რუსეთში უვადო პატიმრობა მისჯილი ქართველი მებრძოლის, 22 წლის მამუკა გაწერელიას ოჯახი უკრაინის და საქართველოს ხელისუფლებას დახმარებას სთხოვს.

  • გაწერელიას დედამ, დალი ჩხეიძემ რადიო თავისუფლებასთან ისაუბრა.

ამ თემაზე: რუსეთმა სამუდამო პატიმრობა მიუსაჯა 22 წლის ქართველ მებრძოლს, რომელიც მარიუპოლში იბრძოდა

დეტალები: დალი ჩხეიძის თქმით, ოჯახს არ ჰყავს ადვოკატი და არც დამხმარე პირი, ვინც რუსეთის სამართალდამცველ უწყებებთან დააკავშირებს და შვილის გათავისუფლებაში დაეხმარება.

  • "ვთხოვ, განსაკუთრებით, უკრაინას. უკრაინამ ყველაფერი უნდა გააკეთოს, რომ გამოიყვანოს ჩემი შვილი. მან სიცოცხლე შესწირა უკრაინას და ის უნდა გამოიყვანონ ციხიდან“, — ამბობს გაწერელიას დედა.

დალი ჩხეიძის თქმით, შვილს 20 თებერვალს ესაუბრა ტელეფონით. დედა-შვილს მხოლოდ 2 წუთით მისცეს საუბრის უფლება.

  • "მისცეს ზარის უფლება და დამელაპარაკა. არ ინერვიულოთ, კარგად ვარო მაგრამ ეს იყო ალბათ, ნათქვამი ზეწოლის ქვეშ, თორემ სურათებშიც ნახავთ, რომ კარგად არ აქვს საქმე. ძალიან შეცვლილია, გამხდარია, თვალები აქვს ჩაშავებული, წარბები არ აქვს... 2 წუთით ვესაუბრე, მეტი არა. ისიც რუსულად გვალაპარაკეს, რომ მათაც გაეგოთ ჩვენ რას ვლაპარაკობდით. ამ ზარს არ ველოდი, მაგრამ ეტყობა ჩვენ, რომ რუსეთში სახალხო დამცველთან დარეკილი გვქონდა და იქ დააფიქსირეს ჩვენი ნომერი და ამიტომ გადმორეკეს“, — თქვა ჩხეიძემ.

მისი თქმით, უკრაინისგან მიიღეს პასუხი, რომ რადგან მათი მოქალაქე არ არის, დახმარება არ შეუძლიათ. დალი ჩხეიძე ამბობს, რომ 2 თვის წინ დახმარებისთვის საქართველოს ხელისუფლებასაც მიმართეს, მათგან საპასუხო ზარი კი 4 დღის წინ მიიღეს — უთხრეს, რომ "საკითხზე მუშაობა დაწყებულია".

რა ვიცით გაწერელიას შესახებ: ამერიკის ხმის ინფორმაციით, გაწერელია აზოვსტალის დაცვაში მონაწილეობდა.

  • ის აფხაზეთიდან დევნილია.
  • მამუკა გაწერელია ტყვედ 2022 წლის 20 მაისს ჩავარდა, როცა მარიუპოლში, მტრის ალყაში მოქცეული, უკრაინის არმიის ქვედანაყოფები პრეზიდენტ ზელენსკის ბრძანებას დაემორჩილნენ და აზოვსტალი დატოვეს.
  • "2022 წლის დასაწყისში გაწყვიტა კონტრაქტი საქართველოს თავდაცვის სამინისტროსთან და მარტში წავიდა მოხალისედ უკრაინაში. საკუთარი სურვილით. სწამდა რომ ეს იყო ბრძოლა საქართველოსთვის. შემდეგ, როცა მარიუპოლში ვითარება გართულდა, ასევე საკუთარი ინიციატივით შეუერთდა აზოვსტალის დამცველებს. 8 დეკემბერს, ტყვეობაში 22 წლის გახდა", — უთხრა მამუკა გაწერელიას დედამ ამერიკის ხმას.