აშშ-ს პრეზიდენტმა დონალდ ტრამპმა მიანიშნა, რომ მისი ადმინისტრაცია მომდევნო დღეებში, სავარაუდოდ, თავდაცვის დეპარტამენტის სახელწოდებას ომის დეპარტამენტით შეცვლის. ინფორმაციას ამის შესახებ Politico ავრცელებს.

ტრამპმა განაცხადა, რომ ოფიციალური პირები დაახლოებით ერთ კვირაში დაუბრუნებენ პენტაგონს უფრო აგრესიულ სახელწოდებას, რომელიც მას ერთ დროს ჰქონდა.

"როდესაც ჩვენ მოვიგეთ პირველი მსოფლიო ომი, მეორე მსოფლიო ომი, მას ერქვა ომის დეპარტამენტი. და ჩემთვის სწორედ ეს არის მისი ნამდვილი არსი... ყველას მოსწონს, რომ ჩვენ გვქონდა წარმოუდგენელი გამარჯვებების ისტორია მაშინ, როცა ეს იყო ომის დეპარტამენტი. შემდეგ კი გადავარქვით თავდაცვის დეპარტამენტი,"— თქვა ტრამპმა სამხრეთ კორეის პრეზიდენტ ლი ჯე მიუნგთან ერთად გამართულ პრესკონფერენციაზე.

ომის დეპარტამენტი 1789 წლიდან 1947 წლამდე არსებობდა, როდესაც პრეზიდენტ ჰარი ტრუმენის ადმინისტრაციამ იგი დააშალა არმიად და საჰაერო ძალებად, გააერთიანა იმ დროისთვის დამოუკიდებელ საზღვაო ძალებთან და თავდაცვის დეპარტამენტი დაარქვა.