ევროპელი ლიდერები — ევროკომისიის პრეზიდენტი ურსულა ფონ დერ ლაიენი, იტალიის პრემიერმინისტრი ჯორჯია მელონი, ფინეთის პრეზიდენტი ალექსანდრ სტუბი, საფრანგეთის პრეზიდენტი ემანუელ მაკრონი, პოლონეთის პრემიერმინისტრი დონალდ ტუსკი, გაერთიანებული სამეფოს პრემიერმინისტრი კირ სტარმერი და გერმანიის კანცლერი ფრიდრიხ მერცი პრეზიდენტ ტრამპისა და პრეზიდენტ პუტინის დაგეგმილ შეხვედრამდე საერთო განცხადებას ავრცელებენ.

განცხადებაში ვკითხულობთ, რომ ევროპელი ლიდერები მზად ყოფნას გამოთქვამენ დიპლომატიური ძალების გაერთიანებით მხარი დაუჭირონ უკრაინას და რუსეთის უკანონო შეჭრა და მკვლელობები დაასრულონ. განცხადებაში ასევე ვკითხულობთ, რომ ევროპის ლიდერები აშშ-ის პრეზიდენტს, დონალდ ტრამპს მადლობას უხდიან გაწეული ძალისხმევისთვის და ახსენებენ, რომ "უკრაინაში მშვიდობის დამყარების გზა უკრაინის გარეშე ვერ გადაწყდება".

"მივესალმებით პრეზიდენტ ტრამპის ძალისხმევას, რომელიც მიზნად ისახავს უკრაინაში მკვლელობების შეჩერებას, რუსეთის ფედერაციის მიერ წარმოებული აგრესიული ომის დასრულებას და უკრაინისთვის სამართლიანი და მდგრადი მშვიდობისა და უსაფრთხოების უზრუნველყოფას.

დარწმუნებული ვართ, რომ წარმატება მხოლოდ იმ შემთხვევაში იქნება შესაძლებელი, თუ დიპლომატიური ძალები გაერთიანდებიან უკრაინის მხარდაჭერად და რუსეთის ფედერაციაზე ზეწოლა, რათა მან უკანონო ომი შეწყვიტოს .

მზად ვართ, ხელი შევუწყოთ ამ პროცესს როგორც დიპლომატიური გზებით, ასევე უკრაინისთვის არსებითი სამხედრო და ფინანსური დახმარების გაგრძელებით — მათ შორის მოხალისეთა კოალიციის მუშაობით და რუსეთის ფედერაციის მიმართ არსებული და ახალი შემზღუდველი ზომების მხარდაჭერით.

ვიზიარებთ მოსაზრებას, რომ დიპლომატიურმა გადაწყვეტამ უნდა უზრუნველყოს უკრაინისა და ევროპის სასიცოცხლო უსაფრთხოების ინტერესების დაცვა.

ამ ინტერესებში განსაკუთრებული მნიშვნელობა აქვს მტკიცე და სანდო უსაფრთხოების გარანტიებს, რომლებიც უკრაინას მისცემს საშუალებას, ეფექტიანად დაიცვას თავისი სუვერენიტეტი და ტერიტორიული მთლიანობა. უკრაინას აქვს სრული თავისუფლება თავად განსაზღვროს საკუთარი მომავალი. არსებითი მოლაპარაკებები შესაძლებელია მხოლოდ ცეცხლის შეწყვეტის ან საბრძოლო მოქმედებების შემცირების პირობებში. უკრაინაში მშვიდობის დამყარების გზა უკრაინის გარეშე ვერ გადაწყდება. ჩვენ ერთგულნი ვრჩებით პრინციპისა, რომ საერთაშორისო საზღვრები ძალის გამოყენებით არ უნდა შეიცვალოს, ხოლო მოლაპარაკებების საწყისი წერტილი უნდა იყოს არსებული ფრონტის ხაზი.

კიდევ ერთხელ ვადასტურებთ, რომ რუსეთის არაპროვოცირებული და უკანონო შეჭრა უკრაინაში წარმოადგენს გაეროს წესდების, ჰელსინკის საბოლოო აქტის, ბუდაპეშტის მემორანდუმისა და რუსეთის მიერ მიღებული სხვა ვალდებულებების უხეშ დარღვევას. ხაზს ვუსვამთ ჩვენს ურყევ ერთგულებას უკრაინის სუვერენიტეტის, დამოუკიდებლობისა და ტერიტორიული მთლიანობის მიმართ.

ჩვენ მტკიცედ ვდგავართ უკრაინის გვერდით. ერთიანნი ვართ, როგორც ევროპელები, და მიზნად ვისახავთ ჩვენი ინტერესების ერთობლივ დაცვას. გავაგრძელებთ მჭიდრო თანამშრომლობას პრეზიდენტ ტრამპთან და აშშ-თან, ასევე პრეზიდენტ ზელენსკისთან და უკრაინის ხალხთან, მშვიდობის მისაღწევად, რომელიც დაიცავს ჩვენს სასიცოცხლო უსაფრთხოების ინტერესებს," — ვკითხულობთ განცხადებაში.

შეგახსენებთ, 9 აგვისტოს, აშშ-ის პრეზიდენტი დონალდ ტრამპი Truth Social-ზე დაწერა, რომ 15 აგვისტოს ალასკის შტატში ვლადიმერ პუტინს შეხვდება. მოგვიანებით ვოლოდიმირ ზელენსკიმ განაცხადა, რომ "უკრაინელები ოკუპანტს თავიანთ მიწას არ აჩუქებენ და ნებისმიერი გადაწყვეტილება, რომელიც ჩვენს წინააღმდეგ არის, ნებისმიერი გადაწყვეტილება, რომელიც უკრაინის გარეშე მიიღება, ამავდროულად მშვიდობის წინააღმდეგ მიღებული გადაწყვეტილებაა".

• ტრამპის თქმით, 15 აგვისტოს ალასკის შტატში ვლადიმერ პუტინს შეხვდება