გახარია დგამდა ნაბიჯებს, რასაც ქვეყნისთვის მოჰქონდა სერიოზული ზიანი. ეს იყო მისი დავალებები, რასაც ის იღებდა გარედან, ამ შემთხვევაშიც "დიფ სთეითისგან", — ამის შესახებ ოცნების ხელისუფლების პრემიერმა, ირაკლი კობახიძემ ყოფილ შს მინისტრსა და პრემიერმინისტრ გიორგი გახარიაზე საუბრისას თქვა, რომელიც ოცნების ხელისუფლების პარლამენტის საგამოძიებო კომისიაზე მეორედ დაიბარეს.

კობახიძის თქმით, მისმა ნაბიჯებმა "ქვეყნის მნიშვნელოვანი ინტერესების დააზიანა".

"მე უფრო კომპლექსურად მინდა დაგანახოთ გახარიას ქმედებები. ეს არ იყო მარტო იზოლირებული შემთხვევა, როდესაც მან რაღაც პროვოკაცია განახორციელა, რასაც მოჰყვა ქვეყნის ძალიან მნიშვნელოვანი ინტერესების დაზიანება. მანამდე იყო ბასიანის შემთხვევა, პანკისის შემთხვევა, უამრავი შემთხვევა, როდესაც გახარია დგამდა ნაბიჯებს, რასაც ქვეყნისთვის მოჰქონდა სერიოზული ზიანი. მე ვერ დავიჯერებ, რომ ამას გახარია აკეთებდა მხოლოდ სისულელით და არა დაკვეთების და დავალების შესაბამისად. გახარიას ჰქონდა მარტივი დაკვეთა, განეხორციელებინა პროვოკაციები, იმისათვის, რომ ქვეყნის ინტერესები დაეზიანებინა. ეს იყო მისი დავალებები, რასაც ის იღებდა გარედან, ვისგან, გასაგებია — ამ შემთხვევაშიც "დიფ სთეითისგან". ჩვენი ერთ-ერთი გზავნილი საზოგადოების წინაშე არის ის, რომ დღეს საქართველო არის დამოუკიდებელი და სუვერენული, როგორც არასდროს. ჩვენ მართულები არ ვიყავით, ანგარიშის გაწევა გვიწევდა "დიფ სთეითისთვის". ასეთი მდგომარეობა იყო 2019 წელსაც, როდესაც "დიფ სთეითიდან" გაისმა ზარი. "დიფ სთეითში" ვგულისხმობთ რას — ეს იყო ოფიციალური თანამდებობის პირი, ეს არ იყო არაფორმალური თანამდებობის პირი. ეს იყო ოფიციალური თანამდებობის პირი, თუმცა, იმ მომენტში ის გამოხატავდა არა შესაბამისი სუბიექტის, არამედ "დიფ სთეითის" ინტერესებს. დღეს ჩვენ ასეთ კომპრომისებს არ ვუშვებთ", — განაცხადა ირაკლი კობახიძემ გიორგი გახარიაზე.

პარტიამ გახარია საქართველოსთვის გუშინ გაავრცელა განცხადება, რომ "გიორგი გახარია წინასწარ დაგეგმილი ვიზიტით საზღვარგარეთ იმყოფება და გამოთქვა მზაობა, საგამოძიებო კომისიის სხდომაში მონაწილეობა მიიღოს დისტანციურ, ე.წ. "ონლაინ” რეჟიმში", რაზეც ოცნების პარლამენტის საგამოძიებო კომისიამ უარი განაცხადა. ისინი გახარიას საგამოძიებო კომისიაზე გამოცხადებას მოითხოვენ.

შეგახსენებთ, რომ გიორგი გახარია საგამოძიებო კომისიაში მეორედ დაიბარეს. პირველად ოცნების პარლამენტის საგამოძიებო კომისიის წინაშე მიმდინარე წლის აპრილში წარდგა.