ამერიკის შეერთებული შტატები სახელმწიფო დეპარტამენტი რუსეთის მიერ ოკუპირებული ყირიმის სასამართლოს გადაწყვეტილებას ეხმაურება და შეშფოთებას გამოთქვამს.

ამერიკის ხმის ცნობით, ეგრეთ წოდებულმა სასამართლომ რადიო თავისუფლების ჟურნალისტი მიკოლა სემენა დამნაშავედ სცნო, ორ-ნახევარი წლით პირობითი სასჯელი შეუფარდა და ასევე, მომავალში ჟურნალისტური საქმიანობა აუკრძალა.

მის მიმართ აღძრული საქმე და ბრალდებები სწორედ მის ჟურნალისტურ საქმიანობას უკავშირდება, რადგან ის ყირიმის მიმართ რუსეთის პოლიტიკას აკრიტიკებდა.

ამერიკის სახელმწიფო დეპარტამენტი შეშფოთებას გამოთქვამს სასამართლოს გადაწყვეტილების შესახებ და მოუწოდებს ოკუპანტი რეჟიმის ადგილობრივ ხელისუფლებას, გაათავისუფლოს ჟურნალისტი, მოუხსნან მას ბრალდება და მისცენ უფლება განაგრძოს თავისი ჟურნალისტური საქმიანობა. ასევე შეწყვიტონ ყირიმში განსხვავებული აზრის ჩახშობის მცდელობა.

სახელმწიფო დეპარტამენტი კიდევ ერთხელ უსვამს ხაზს, რომ ყირიმი რჩება უკრაინის შემადგენელ ნაწილად და ამერიკის შეერთებული შტატები კვლავ მტკიცედ უჭერს მხარს უკრაინის ტერიტორიულ მთლიანობასა და სუვერენიტეტს.