აზერბაიჯანელი რეპერი აკბარ ნოვრუზლუ ეპი პირადი მოხმარების მიზნით ნარკოტიკების უკანონო შენახვასა და წვრილმან ხულიგნობაში დამნაშავედ ცნეს და ერთ თვიანი პატიმრობა მიუსაჯეს. თუმცა, დამოუკიდებელი მედიასაშუალების, Meydan TV-ის განცხადებით, ის დააპატიმრეს, რადგან რეპ-შეჯიბრების დროს გააკრიტიკა Pasha Bank-ი და Kapital Bank-ი, რომლებიც ნაწილობრივ პრეზიდენტ ილჰამ ალიევის ოჯახის წევრებს ეკუთვნით.

Pasha Bank და Kapital Bank Pasha Holding-ის საკუთრებაა, რომლის აქციონერებს შორისაც არიან ალიევის ქალიშვილები.

თავდაპირველად, პროსამთავრობო მედიასაშუალება Qafqazinfo-მ გაავრცელა ინფორმაცია, რომ ეპი დააკავეს "შეურაცხმყოფელი და ვულგარული გამოთქმების გამოყენებისთვის".

თუმცა, Meydan TV-მ განაცხადა, რომ რეპერი, სავარაუდოდ, დააკავეს რამდენიმე დღის წინ ბაქოს ბულვარზე რეპ-შეჯიბრების დროს ბანკების შესახებ გაკეთებული განცხადებების გამო. სოციალურ მედიაში ვრცელდება ვიდეოები, რომლებიც მიუთითებს, რომ დაკავების მიზეზი ეპის მიერ სცენაზე რეპერ პარვიზ გულუზადა პასტერისთვის ნათქვამი სიტყვები იყო.

"შენც რადიკალი იყავი. ერთ დროს Pasha Bank-ზე "დისი" დაწერე და ახლა Kapital Bank-ის კალთაში იჯექი," — Meydan TV-ის ცნობით, რეპავდა ეპი რეპ-ბრძოლის დროს.

სოციალურ ქსელებში სიახლეების კომენტარებში მაყურებლებმა განაცხადეს, რომ ბრძოლაში უცენზურო ენა მისაღებია და ეს რეპში ნორმალური მოვლენა უნდა იყოს.

ეპიმ ასევე ბოდიში მოიხადა ოთხშაბათს და თქვა, რომ ნანობს, თუ ვინმეს ოჯახი შეაწუხა თავისი უცენზურო ენით.

"ჩვენს პროფესიაში გარკვეული დოზით არსებობს უხეშობა. რა თქმა უნდა, ეს უნებლიეა. მომავალში უფრო ფრთხილად ვიქნები," — განაცხადა რეპერმა.

უკვე მეორე შემთხვევაა, როცა ეპის Pasha Bank-ის კრიტიკასთან დაკავშირებით აპატიმრებენ.

Qafqazinfo-ს ცნობით, ხუთი წლის წინ წვრილმანი ხულიგნობისა და პოლიციის ბრძანების დაუმორჩილებლობისთვის დააკავეს რეპერი პარვიზ გულუზადა პასტერიც. მისი დაპატიმრება მალევე მოხდა მას შემდეგ, რაც მან გამოაქვეყნა რეპი, რომელშიც იყო ფრაზა: "მე დავიპყრობ ქვეყანას ისე, როგორც Pasha Bank-მა გააკეთა".

YouTube-ის მომხმარებლებმა ვიდეოს ქვეშ კომენტარებში აღნიშნეს, რომ ვიდეო მისი დაპატიმრების შემდეგ მიუწვდომელი გახდა.

თუმცა, ბოლო წლებში პასტერი თავს იკავებდა ბანკის კრიტიკისგან და Meydan TV-ის ცნობით, ის Kapital Bank-ის რეკლამის სახე გახდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.