საზოგადოებრივი მაუწყებლის აჭარის ტელევიზიისა და რადიოს ჟურნალისტი, ჯენი კვანტალიანი ამბობს, რომ მას თურქეთის საბაჟო სამსახურის თანამშრომლებმა ფიზიკური შეურაცხყოფა მიაყენეს. ინციდენტის შესახებ კვანტალიანი On.ge-ს ესაუბრა.

მისი თქმით, ის და თავისი ოპერატორი საზღვრის ნეიტრალურ ზონაში გადაღებას არ გეგმავდნენ, თუმცა ამის მიუხედავად თურქეთის საბაჭო სამსახურის თანამშრომლებმა ოპერატორისთვის კამერის წართმევა სცადეს და მოსთხოვეს მეხსიერების ბარათისა და ელემენტის მოხსნა და მათთვის მიცემა.

"ორივე მხარიდან მოკიდეს ხელი ჩემს ოპერატორს და ძალისმიერი მეთოდით მიჰყავდათ, ფიზიკური შეურაცხყოფა იყო მის მიმართ. ამის მერე ფეისბუკლაივი ჩავრთე, რის შემდეგაც მე ხელები გადამიგრიხეს, ჩამარტყეს რამდენჯერმე, წამართვეს პირადობის დამადასტურებელი მოწმობა და მობილური", - ამბობს კვანტალიანი, რომლიც დასძენს, რომ მობილური ერთ-ერთი მოქალაქის საშუალებით დაიბრუნა, პირადობის მოწმობა კი - ვერა.

ჟურნალისტის თქმით, ინციდენტს შეესწრნენ საბაჟოს ქართული მხარის წარმომადგენლები, თუმცა მათ დახმარება არ უცდიათ. შემთხვევის შესახებ აჭარის ტელევიზიის დირექტორმა, ნათია კაპანაძემ თურქეთის საკონსულოსთან ერთად, საქართველოს შინაგან საქმეთა სამინისტროს აცნობა და მათგან გამოძიება მოითხოვა.

დღეს, 25 სექტემბერს, საქართველო-თურქეთის საზღვარზე, სარფის საბაჟოზე, საქართველოდან მიმავალი ადამინების ნაწილს პრობლემა შეექმნა. აჭარის ტელევიზიის თანამშრომლები საზღვარზე მოვლენის გასაშუქებლად მივიდნენ. თუქეთის საბაჟო სამსახურის თანამშრომლების მიმართ ფიზიკურ შეურაცხყოფაზე ბრალდებები არაერთხელ ყოფილა.