პრეზიდენტმა დონალდ ტრამპმა განაცხადა, რომ აპირებს უკრაინისთვის დამატებითი თავდაცვითი იარაღის გაგზავნას, მას შემდეგ რაც გასულ კვირას მისმა ადმინისტრაციამ დროებით შეაჩერა ზოგიერთი სახის იარაღის მიწოდება. ამის შესახებ ინფორმაციას CNN ავრცელებს.

"ჩვენ მეტ იარაღს გავუგზავნით. ასე უნდა იყოს — მათ თავი უნდა დაიცვან", — თქვა ტრამპმა, როცა ის ისრაელის პრემიერმინისტრ ბენიამინ ნეთანიაჰუსთან ერთად ვახშამზე იმყოფებოდა.

"მათ ძლიერად ურტყამენ. კიდევ იარაღის გაგზავნა მოგვიწევს", — დასძინა ტრამპმა. "ძირითადად თავდაცვითი იარაღი, მაგრამ მათ მართლაც ძალიან ძლიერად ურტყამენ".

პრეზიდენტის ეს განცხადება თეთრი სახლის მაღალი რანგის წარმომადგენლის განცხადებას მოჰყვა CNN-თან იმის შესახებ, რომ ტრამპის ადმინისტრაციამ დროებით შეაჩერა გარკვეული იარაღის, მათ შორის საჰაერო თავდაცვის რაკეტების, გაგზავნა უკრაინისთვის. ეს გადაწყვეტილება მიღებულ იქნა თავდაცვის ხარჯების გადახედვისა და ამერიკის საგარეო დახმარების შეფასების შემდეგ, რომელიც თავდაცვის მინისტრმა პიტ ჰეგსეტმა დაამტკიცა.

თეთრი სახლის პრესმდივნის მოადგილემ, ანა კელიმ, მაშინ განაცხადა, რომ გადაწყვეტილება მიღებულ იქნა იმ მიზნით, რომ "ამერიკის ინტერესები პირველ ადგილზე იყოს".

CNN წერს, რომ ზოგიერთი ამერიკელი ოფიციალური პირი ვარაუდობს, რომ უკრაინისთვის დახმარების გადახედვა ნაწილობრივ უკავშირდება პენტაგონის სტრატეგიას, რომელიც კონცენტრირებულია ჩინეთზე და მომავალი პოტენციური კონფლიქტისთვის მზადებაზე წყნარ ოკეანეში — ეს მიმართულება პრიორიტეტულია პენტაგონის პოლიტიკის ხელმძღვანელის, ელბრიჯ კოლბის, მხრიდან.

აშშ უკრაინისთვის სამხედრო დახმარების უმსხვილესი დონორია მას შემდეგ, რაც რუსეთმა 2022 წელს სრულმასშტაბიანი ომი დაიწყო. ვაშინგტონი აწვდიდა უკრაინას საჰაერო თავდაცვის სისტემებს, დრონებს, რაკეტსატყორცნებს, რადარებს, ტანკებსა და ტანკსაწინააღმდეგო იარაღს, რამაც აშშ-ის მარაგების შემცირების შესახებ შეშფოთება გამოიწვია.

ტრამპმა ადრე მარტში სრულად შეაჩერა სამხედრო დახმარების გაგზავნა უკრაინისთვის, მას შემდეგ რაც ოვალურ ოფისში უკრაინის პრეზიდენტ ვოლოდიმირ ზელენსკისთან გამწვავებული დისკუსია ჰქონდა. დაახლოებით ერთი კვირის შემდეგ, მან კვლავ განაახლა დახმარების მიწოდება.

იარაღის დამატებითი გაგზავნის გადაწყვეტილება ასევე მოჰყვა ტრამპის ცალკეულ საუბრებს გასულ კვირას როგორც რუსეთის პრეზიდენტ ვლადიმირ პუტინთან, ასევე ზელენსკისთან. ტრამპმა განაცხადა, რომ პუტინთან საუბარი იმედგამაცრუებელი იყო და "ცეცხლის შეწყვეტის" მხრივ პროგრესი არ აღინიშნებოდა.

ამასობაში, ზელენსკი ბოლო კვირებში ითხოვს დასავლელი მოკავშირეებისგან, რომ გააძლიერონ უკრაინის საჰაერო თავდაცვა, განსაკუთრებით რუსული ინტენსიური საჰაერო თავდასხმების ფონზე. პარასკევს ღამით, პუტინთან სატელეფონო საუბრის შემდეგ რამდენიმე საათში, რუსეთმა უკრაინაზე უპრეცედენტო რაოდენობის დრონები გაუშვა.

ტრამპმა პარასკევს განაცხადა, რომ აშშ განიხილავს უკრაინის თხოვნას დამატებითი "პატრიოტის" თავდაცვის სისტემების მიწოდებაზე, მას შემდეგ რაც მას ზელენსკისთან "ძალიან კარგი“ სატელეფონო საუბარი ჰქონდა. უკრაინის პრეზიდენტმა შაბათს განაცხადა, რომ ეს იყო საუკეთესო და „ყველაზე პროდუქტიული" საუბარი, რაც მას ტრამპთან ჰქონია.

ტრამპმა ორშაბათს კიდევ ერთხელ დაადასტურა თავისი უკმაყოფილება პუტინის მიმართ და აღნიშნა: "არანაირად არ ვარ კმაყოფილი პრეზიდენტ პუტინით".

მეტი ამერიკა-უკრაინის ურთიერთობებზე