ამერიკის შეერთებული შტატების პრეზიდენტი დონალდ ტრამპი კანადაში "დიდი შვიდეულის" (G7) სამიტის ფარგლებში ორმხრივ შეხვედრებს ვოლოდიმირ ზელენსკისთან, მექსიკის პრეზიდენტ კლაუდია შეინბაუმთან და კანადის პრემიერ-მინისტრ მარკ კარნისთან გამართავს. ამის შესახებ ჟურნალისტებს თეთრი სახლის წარმომადგენელმა განუცხადა.

ოფიციალური პირის განმარტებით, სამიტის ფარგლებში ტრამპი "ორმხრივ შეხვედრებს კარნისთან, ზელენსკისთან და შეინბაუმთან გაიმართავს."

ტრამპისა და ზელენკის კანადაში შეხვედრის შესახებ წერს რუსული მედიაც. ამას გარდა, დღეს Foreign Press USA-ს კორესპონდენტი ალექს რაუფოღლუ წერს, რომ "თეთრი სახლის წარმომადგენელმა დაადასტურა, რომ პრეზიდენტი G7-ის სამიტზე ზელენსკისთან ორმხრივ შეხვედრას გამართავს. ის ასევე კარნის და შეინბაუმს შეხვდება".

ტრამპი კანადაში უკვე ჩავიდა. G7-ის სამიტი (გაერთიანებული სამეფო, გერმანია, იტალია, კანადა, აშშ, საფრანგეთი და იაპონია) 15-17 ივნისს, კანადის საკურორტო ზონაში — კანანასკისში გაიმართება.