ორშაბათს, 16 ივნისს, აშშ-ის პრეზიდენტმა დონალდ ტრამპმა გადაწყვიტა, სასწრაფოდ შეეწყვიტა მონაწილეობა G7-ის სამიტში, რომელიც კანანასკისში, კანადაში იმართება. ამ ნაბიჯის მიზეზი ახლო აღმოსავლეთში არსებული ვითარებაა. მანამდე ტრამპი ბრიტანეთის პრემიერმინისტრ კირ სტარმერს და გერმანიის კანცლერ ფრიდრიხ მერცს შეხვდა.

თეთრი სახლის პრესსამსახურის მიერ გავრცელებულ განცხადებასა და ინფორმაციას G7-ის სამიტის პირველი დღის შესახებ DW ავრცელებს.

ტრამპის პრესმდივანმა, კეროლაინ ლივიტმა სოციალურ ქსელ X-ზე დაწერა, რომ ამერიკელმა ლიდერმა სამიტზე "შესანიშნავი დღე გაატარა", როდესაც ბრიტანეთის პრემიერმინისტრ კირ სტარმერთან მნიშვნელოვან სავაჭრო შეთანხმებას მოაწერა ხელი. "ბევრი რამ მიღწეული იქნა, მაგრამ ახლო აღმოსავლეთში მიმდინარე მოვლენების გამო, პრეზიდენტი ტრამპი საღამოს სახელმწიფოს მეთაურებთან ვახშმის შემდეგ [აშშ-ში] გაემგზავრება".

CBS News-ის ცნობით, აშშ-ის სახელმწიფო მდივანი მარკო რუბიო კანადიდან ვაშინგტონში თეთრი სახლის ხელმძღვანელთან ერთად მიფრინავს. CNN-ის ცნობით, ტრამპმა თავისი ადმინისტრაციის პერსონალს, რომელიც პასუხისმგებელია ეროვნულ უსაფრთხოებაზე, ვაშინგტონში, თეთრი სახლის "სიტუაციურ ოთახში" შეკრება დაავალა. ეს არის ოთახების კომპლექსი, რომელსაც აშშ-ის პრეზიდენტი, მისი მრჩევლები და სამხედრო და სადაზვერვო სააგენტოების წარმომადგენლები იყენებენ კრიზისულ სიტუაციებში სასწრაფო შეხვედრების ჩასატარებლად. სიტუაციურ ოთახში დამონტაჟებული საკომუნიკაციო აღჭურვილობა სახელმწიფოს მეთაურს საშუალებას აძლევს, მთელ მსოფლიოში ამერიკული ჯარები მართოს.

ლივიტის მიმართვამდე დაახლოებით ერთი საათით ადრე, ამერიკელმა ლიდერმა თავის სოციალურ ქსელ Truth Social-ში გამოაქვეყნა პოსტი, რომელშიც კიდევ ერთხელ განაცხადა, რომ "ირანს არ უნდა ჰქონდეს ბირთვული იარაღი" და "ყველამ დაუყოვნებლივ უნდა დატოვოს თეირანი".

"ირანს "შეთანხმებისთვის" ხელი უნდა მოეწერა, მე ვუთხარი, რომ უნდა გაეფორმებინათ. როგორი სამწუხაროა და ადამიანთა სიცოცხლის როგორი გაფლანგვაა. მარტივად რომ ჩამოვაყალიბოთ, ირანს ბირთვული იარაღი ვერ ექნება. ამას ბევრჯერ ვიმეორებდი! თეირანიდან ევაკუაცია ყველამ დაუყოვნებლივ უნდა დაიწყოს!", — წერს ტრამპი.

სტარმერის გარდა, აშშ-ის პრეზიდენტმა კანანასკისის სამიტის ფარგლებში 20-წუთიანი საუბარი გამართა გერმანიის კანცლერ ფრიდრიხ მერცთანაც. ორმა ლიდერმა განიხილა ისრაელსა და ირანს შორის მიმდინარე საომარი მოქმედებები, რომლებიც მეოთხე დღეა მიმდინარეობს და შეთანხმდნენ, რომ უნდა მოიძებნოს გზები ესკალაციის შესაჩერებლად და რომ ირანის ბირთვული პროგრამა უნდა შეჩერდეს.

AP იუწყება, რომ სამშაბათს, 17 ივნისს, ტრამპი ასევე უნდა შეხვედროდა მექსიკისა და უკრაინის პრეზიდენტებს კლაუდია შეინბაუმს და ვოლოდიმირ ზელენსკის. თუმცა, როგორც ჩანს, ეს შეხვედრები ვეღარ შედგება.

საფრანგეთის პრეზიდენტმა ემანუელ მაკრონმა გამოთქვა მოსაზრება, რომ ტრამპის ვაშინგტონში საგანგებო გამგზავრება "დადებითი ამბავია" იმ კონტექსტში, რომ თეთრი სახლის ხელმძღვანელმა ისრაელსა და ირანს შორის ცეცხლის შეწყვეტის მიღწევის პირობა დადო.