ბაქო მოსკოვს ეკატერინბურგში დაკავებული 2 აზერბაიჯანელის მკვლელობაში ადანაშაულებს. აზერბაიჯანის გენერალურმა პროკურატურამ სისხლის სამართლის საქმე აღძრა ეკატერინბურგში აზერბაიჯანის ორი მოქალაქის დაკავების შემდეგ წამებისა და განსაკუთრებით სასტიკი განზრახ მკვლელობის ფაქტზე. რუსეთ-აზერბაიჯანს შორის ბოლო დროს განვითარებულ მოვლენებზე DW წერს.

27 ივნისს ჩატარებული ოპერატიული და საგამოძიებო ღონისძიებების დროს, რუსმა სამართალდამცავებმა "აწამეს აზერბაიჯანის რესპუბლიკის მოქალაქეები და აზერბაიჯანული წარმოშობის სხვა პირები, რომლებიც დაუცველ მდგომარეობაში იმყოფებოდნენ და არ ჰქონდათ თავის დაცვის შესაძლებლობა", — ნათქვამია სააგენტოს მიერ სამშაბათს, 1-ელ ივლისს გამოქვეყნებულ განცხადებაში.

აღნიშნულია, რომ ძალადობა გამოიყენეს როგორც დაკავების პროცესში, ასევე ტრანსპორტირებისთვის გამოყენებულ მანქანებში.

"მსხვერპლებს სხეულის სხვადასხვა ნაწილში არაერთხელ დაარტყეს მყარი ბლაგვი საგნებით, რის შედეგადაც მათ სხეულის მძიმე დაზიანებები მიიღეს", — აცხადებს გენერალური პროკურატურა.

აზერბაიჯანული მხარის ცნობით, 60 წლის გუსეინ საფაროვი 27 ივნისის შუადღისას ეკატერინბურგში, შინაგან საქმეთა სამინისტროს ადმინისტრაციულ შენობაში გარდაიცვალა "მრავლობითი დაზიანებებით, მათ შორის ნეკნების მრავალი მოტეხილობით გამოწვეული პოსტტრავმული და პოსტჰემორაგიული შოკით". მისი ძმა, 55 წლის ზიადინ საფაროვი, იმავე დღის დილით ოპერატიული სააგენტოს სამსახურებრივ მანქანაში გარდაიცვალა "მრავლობითი სხეულის დაზიანებების ფონზე განვითარებული პოსტტრავმული შოკით".

სხვა დაკავებული აზერბაიჯანელი მოქალაქეები "ასეთივე წამების მსხვერპლნი გახდნენ, რის შედეგადაც მათ სხვადასხვა სიმძიმის სხეულის დაზიანებები მიიღეს და ამჟამად მკურნალობას რუსეთის ფედერაციის ტერიტორიაზე არსებულ სამედიცინო დაწესებულებებში აგრძელებენ", — ნათქვამია განცხადებაში.

საქმე აღიძრა ქვეყნის ფარგლებს გარეთ ჩადენილი დანაშაულების მუხლებით, მათ შორის, განსაკუთრებული სისასტიკით პირთა ჯგუფის მიერ განზრახ მკვლელობის, თანამდებობის ბოროტად გამოყენების და წამების მუხლებით, რამაც მსხვერპლთა სიკვდილი გამოიწვია.

როდიდან დაიძაბა რუსეთსა და აზერბაიჯანს შორის ურთიერთობები?

რუსეთსა და აზერბაიჯანს შორის ურთიერთობები მას შემდეგ გაუარესდა, რაც 27 ივნისს ეკატერინბურგში, რუსეთის ხელისუფლების ცნობით, 2000-იანი წლების დასაწყისში ჩადენილი მკვლელობებისთვის მასობრივად დააკავეს აზერბაიჯანული დიასპორის წარმომადგენლები. რეიდის შემდეგ, აზერბაიჯანის საგარეო საქმეთა სამინისტრომ განაცხადა, რომ დაკავებულებს შორის არიან გარდაცვლილები და დაჭრილები და მოითხოვა, რომ "ამ მიუღებელი ძალადობისთვის პასუხისმგებელი პირები" პასუხისგებაში მიეცნენ.

რუსეთის ფედერაციის საგამოძიებო კომიტეტმა შემდგომში განაცხადა, რომ ერთ-ერთი დაკავებული, წინასწარი მონაცემებით, გულის უკმარისობით გარდაიცვალა, ხოლო მეორეს გარდაცვალების მიზეზი დგინდება. 28 ივნისს, დეპარტამენტის ხელმძღვანელმა, ალექსანდრე ბასტრიკინმა, საგამოძიებო კომიტეტის სვერდლოვსკის დეპარტამენტს დაავალა აზერბაიჯანელების დაკავებისა და ორი ადამიანის გარდაცვალების შესახებ დეტალური ანგარიშის წარდგენა.

ეკატერინბურგში რეიდის შემდეგ, აზერბაიჯანის ხელისუფლებამ გააუქმა სახელმწიფო და კერძო დაწესებულებების მიერ რუსეთიდან დაგეგმილი ყველა კულტურული ღონისძიება. აზერბაიჯანის საპარლამენტო დელეგაციამ გააუქმა მოსკოვში ვიზიტი რუს კანონმდებლებთან ერთობლივ სხდომაზე.

დაკავებები "სპუტნიკ აზერბაიჯანის" ბაქოს ოფისში

30 ივნისს, პოლიციამ ბაქოში რუსული საინფორმაციო სააგენტო "სპუტნიკ აზერბაიჯანის" ოფისში ჩხრეკა ჩაატარა. როგორც ადგილობრივი მედია აზერბაიჯანის შინაგან საქმეთა სამინისტროზე დაყრდნობით 1 ივლისს იტყობინებოდა, თაღლითობის, უკანონო მეწარმეობისა და ფულის გათეთრების საქმესთან დაკავშირებით შვიდი პირი დააკავეს, სააგენტოს ცნობით, ორი დააპატიმრეს, ხოლო ხუთი სისხლის სამართლის პასუხისგებაში მიეცა.

ერთი დღით ადრე გავრცელდა ინფორმაცია, რომ "სპუტნიკ აზერბაიჯანის" ოფისში ორი პირი დააკავეს. მედიამ დაკავებულებს რუსეთის ფედერალური უსაფრთხოების სამსახურის (FSB) აგენტები უწოდა. თავად საინფორმაციო სააგენტომ დააკონკრეტა, რომ დააკავეს "სპუტნიკ აზერბაიჯანის" აღმასრულებელი დირექტორი იგორ კარტავიხი და მთავარი რედაქტორი ევგენი ბელუსოვი. რედაქციამ FSB-სთვის მათი მუშაობის ბრალდებებს აბსურდული უწოდა.

რუსეთის პრეზიდენტის პრესმდივანმა დიმიტრი პესკოვმა 1 ივლისს გამართულ ბრიფინგზე განაცხადა, რომ აზერბაიჯანში რუსეთის მოქალაქეების დაკავება "არ შეესაბამება მოსკოვსა და ბაქოს შორის ურთიერთობების ზოგადად მიღებულ წესებსა და სულისკვეთებას". პესკოვის თქმით, მოსკოვი იმედოვნებს, რომ უახლოეს მომავალში, პირდაპირი კონტაქტების გზით, შესაძლებელი იქნება დაკავებული რუსების გათავისუფლება.

ამ ფონზე, რუსეთის საგარეო საქმეთა სამინისტროს ვებგვერდზე გამოქვეყნებული ინფორმაციით, რუსეთში აზერბაიჯანის ელჩს, რახმან მუსტაფაევს, სიტყვიერი ნოტა გადაეცა, რომლითაც ბაქოში დაკავებული რუსი ჟურნალისტების, იგორ კარტავიხისა და ევგენი ბელოუსოვის დაუყოვნებლივ გათავისუფლებას ითხოვენ.