ოცნების დეპუტატების — ნინო წილოსანის, მარიამ ლაშხის, მამუკა მდინარაძის და თეა წულუკიანის სოციალურ ქსელში შეურაცხყოფისთვის 20-მდე პირს დღეს სასამართლოში იბარებენ.

მათ შორის არიან:

ჟურნალისტები — ვახო სანაია, დეა მამისეიშვილი, ნანუკა ჟორჟოლიანი, ვიკა ბუკია, ეკა მიშველაძე, ტელეკომპანია "ფორმულას" თანადამფუძნებელი მიშა მშვილდაძე;

პოლიტიკოსები — პარტია ფედერალისტების ერთ-ერთი ლიდერი თამარ ჩერგოლეიშვილი, ენმ-ს ლიდერი ლევან ხაბეიშვილი, კოალიცია ცვლილებისთვის ლიდერი ელენე ხოშტარია, კოალიცია ძლიერი საქართველოსთვის ერთ-ერთი ლიდერი ალეკო ელისაშვილი;

აქტივისტები — მარიამ გეგუჩაძე, ანა სუბელიანი, ქეთი მოლაშვილი, გიგა მაქარაშვილი.

ასევე — "ანტისაოკუპაციო მოძრაობის" ლიდერი დავით ქაცარავა, საერთაშორისო ურთიერთობათა სპეციალისტი გიორგი ტუმასიანი, "საფარის" ხელმძღვანელი ბაია პატარაია, ეროვნული ბანკის ყოფილი პრეზიდენტი გიორგი ქადაგიძე.

ყველა მათგანს გუშინ, 11 ივნისის საღამოს დაუკავშირდნენ და დრეს, 12 ივნისს დაიბარეს სასამართლოზე.

"სარჩელი დღეს შევიდა, პროცესები სასწრაფოდ ხვალვე დანიშნეს. რვის ნახევარზე დაგვირეკეს, როცა სასამართლო წესით აღარ უნდა მუშაობდეს.

რატომ?

ჩემი აზრით ცდილობენ მათე დევიძის ხვალინდელი სასამართლო გადაფარონ", — დაწერა სოციალურ ქსელში ნანუკა ჟორჟოლიანმა 11 ივნისს.

საქალაქო სასამართლოდან მიღებული სმს-ის სქრინს აქვეყნებს კოალიცია ცვლილებისთვის ერთ-ერთი ლიდერი ელენე ხოშტარია, სადაც წერია, რომ მის საქმეს მოსამართლე დავით თეთრაული განიხილავს და სასამართლო სხდომა 12:00 საათზეა ჩანიშნული. ელენე ხოშტარია ნინო წილოსანისა და მარიამ ლაშხის საჩივრის საფუძველზეა სასამართლოში დაბარებული.

გიორგი ტუმასიანი წერს, რომ "მარიამ ლაშხმა კი არ უჩივლა, დეტექტივი შალვა ბურჯალიანი ათვალიერებდა მის ფეისბუქ-გვერდს "სამართალდარღვევაზე რეაგირების მიზნით" რა დროსაც აღმოაჩინა 10 დღის წინანდელი "სამართალდარღვევა", სადაც მარიამ ლაშხს "სამშობლოს მოღალატეს" და "ბოლშევიკს" უწოდებს ლიკა ლორთქიფანიძისა და მარიამ აფრიამაშვილის წინააღმდეგ საჩივრის დაწერისთვის, რომლებმაც მარიამ ლაშხის შეურაცხყოფისთვის 12-დღიანი პატიმრობა უკვე მოიხადეს.

ასევე მარიამ ლაშხის შეურაცხყოფისთვის იბარებენ "ტვ პირველს" ჟურნალისტს ვიკა ბუკიას. მისი პროცესი 12 ივნისს 15:00 საათზეა ჩანიშნული.

"კი მაგრამ ამ მარიამ ლაშხს ამდენმა კაცმა რატომ დაუძახა მონა? რა ხდება? რა დამთხვევაა? Mariam Lashkhi რა ქენი ამისთანა?", — წერს ვიკა ბუკია.

ჟურნალისტ დეა მამისეიშვილს ოცნების ერთ-ერთი ლიდერის, მამუკა მდინარაძის საჩივრის საფუძველზე იბარებენ. მას მამუკა მდინარაძე 25 თებერვალს დაწერილი პოსტის გამო უჩივის.

"ხვალ სასამართლოში მიბარებენ, რადგან მამუკას ვაწყენინე. მამუკა მდინარაძემ იგრძნო თავი შეურაცხყოფილად და შსს-მ და სასამართლომ იგრძნეს თავი საჭიროდ. ჰაი, გეკა. მამუკა მიჩივის 25 თებერვლის პოსტის გამო, სადაც ნაბიჭვარს, ნაძირალას და არაადამიანს ვეძახი. და კი, ეს ჩემი გამოხატვის თავისუფლებაა. ასე ვფიქრობ, (უარესადაც) და ვერავინ შემზღუდავს," — წერს დეა მამისეიშვილი.

ფედერალისტების ლიდერს, თამარ ჩერგოლეიშვილს სასამართლოში სოციალურ ქსელში მამუკა მდინარაძისა და თეა წულუკიანის შეურაცხყოფისთვის იბარებენ. ის ვიდეოს აქვეყნებს, სადაც ამბობს, რომ სანამ საკუთარ ტელეფონის ნომერზე არ მიიღებს შეტყობინებას ან ოფიციალურ წერილს, სადაც განმარტებული იქნება სასამართლოში დაბარების ოფიციალური მიზეზები, სასამართლოში არ მივა,.

საია-ს ცნობით, საჩივრების სამართლებრივი საფუძველია ადმინისტრაციულ სამართალდარღვევათა კოდექსის ახლად ამოქმედებული 17316-ე მუხლი, რომელიც პასუხისმგებლობას ითვალისწინებს ისეთი ქმედებებისთვის როგორიცაა: სახელმწიფო-პოლიტიკური თანამდებობის პირის, პოლიტიკური თანამდებობის პირის, სახელმწიფო მოსამსახურის/ მასთან გათანაბრებული პირის ან/და საჯარო მოსამსახურის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან/საქმიანობასთან დაკავშირებით.

ამ ქმედებისთვის განსაზღვრულია 1 500 ლარიდან 4 000 ლარამდე ჯარიმა ან 45 დღემდე პატიმრობა.

როგორც IPN წერს, შსს-ში აცხადებენ, რომ ადმინისტრაციული წარმოება პოლიტიკური თანამდებობის პირის შეურაცხყოფის, ლანძღვა-გინების საქმეზე დაიწყო.

კერძოდ, უწყებაში განმარტავენ, რომ ადმინისტრაციული სამართალდარღვევის შესახებ ფრაქცია ქართული ოცნების თავმჯდომარის 2025 წლის 6 ივნისს წარმოდგენილი განცხადება/საჩივრის საფუძველზე, საქართველოს შინაგან საქმეთა სამინისტრომ დაიწყო ადმინისტრაციული საქმისწარმოება საქართველოს ადმინისტრაციულ სამართალდარღვევათა კოდექსის 173 (16) მუხლის საფუძველზე. აღნიშნული კი გულისხმობს საქართველოს სახელმწიფო-პოლიტიკური თანამდებობის პირის, პოლიტიკური თანამდებობის პირის სიტყვიერ შეურაცხყოფას, ლანძღვა-გინებას, მასზე შეურაცხმყოფელ გადაკიდებას ან/და მის მიმართ სხვაგვარი შეურაცხმყოფელი ქმედების განხორციელებას სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან ან საქმიანობასთან დაკავშირებით. შსს-ს ინფორმაციით, ადმინისტრაციული საქმის მასალები დღეს, 11 ივნისს წარედგინა თბილისის საქალაქო სასამართლოს.

ციფრულ სივრცეში დაწერილი კომენტარის გამო, პირი შეიძლება დაჯარიმდეს 1500 ლარიდან 4000 ლარამდე ოდენობით ან შეეფარდოს ადმინისტრაციული პატიმრობა 45 დღემდე ვადით.

შეგახსენებთ, რომ ოცნების დეპუტატი მარიამ ლაშხმა 17 მაისს მომხდარი ინციდენტის გამო სამ ახალგაზრდა აქტივისტს უჩივლა — ამ დღეს ისინი ერთ-ერთ კაფეში, სადაც ლაშხი მცირეწლოვან შვილებთან ერთად იყოფებოდა, მასთან მივიდნენ შეძახილებით: "თავისუფლება რეჟიმის ტყვეებს, არა რუსულ რეჟიმს, ძირს რუსეთის მონები, არა რუსეთის მონებს..."

სასამართლოს გადაწყვეტილებით, ლიკა ლორთქიფანიძეს და თათია აფრიამაშვილს 12-12 დღიანი პატიმრობა შეეფარდათ, მაგდა მამუკაშვილს კი სასამართლომ 4000 ლარიანი ჯარიმა დააკისრა.

მარიამ ლაშხის საჩივრის საფუძველზე დაკავებულმა ლიკა ლორთქიფანიძემ და თათია აფრიამაშვილმა 12-დღიანი პატიმრობის შემდეგ იზოლატორი გუშინ დატოვეს.