მსახიობი დევიდ ტენანტი ჰარი პოტერის ავტორ ჯოან როულინგთან დაკავშირებულ ბოლოდროინდელ მითქმა-მოთქმას ეხმაურება. ტენანტი, რომლის კინოროლებს შორის პოტერიადაში შესრულებული პერსონაჟიცაა, ტრანსგენდერი ადამიანების "დემონიზების" წინააღმდეგ გამოდის და ისტორიულ პარალელებს ავლებს.

"მოზარდი რომ ვიყავი, მისის თეტჩერის მთავრობამ 28-ე მუხლი შემოიღო, რომელიც სკოლაში 'ჰომოსექსუალობის პოპულარიზებას' კრძალავდა", — იხსენებს ტენანტი ტელეგადაცემაში, — "ეს ძალიან უცნაური ქოლგა ტერმინი გახლდათ, რომელიც, ფაქტობრივად, გულისხმობდა, რომ სკოლაში აკრძალული იყო გელაპარაკა გეიდ ყოფნაზე ან თუნდაც მიგენიშნებინა, რომ ეს ნორმალურია. ახლა ამას შუასაუკუნეობრივ გადაწყვეტილებად, სულელურ მცდელობად და განსაზღვრებად ვხედავთ. მიმაჩნია, რომ ზუსტად ასე ხდება ტრანსგენდერი ადამიანების დემონიზება და გარიყვა. ეს ყველაფერი პოლიტიკურ ფეხბურთს დაემსგავსა".

სხვათა შორის, როულინგმა წინათ ტენანტსაც გაჰკრა კბილი. მსახიობმა 2024 წლის ივნისში, ბრიტანულ ლგბტქ დაჯილდოებაზე "მოკეტვისკენ" მოუწოდა კონსერვატიული პარტიის წევრ კემი ბადენოქს, რომელიც ქალებისთვის განკუთვნილი სივრცეების ტრანსგენდერი ქალებისთვის აკრძალვის მოთხოვნით გამოვიდა. ამ მძიმე დროს, ფიქრებით დევიდ ტენანტთან ვარო, დაწერა როულინგმა სოციალურ ქსელში, როცა ბადენოქი პარტიის ლიდერი გახდა.

თუმცა, ტენანტი მწერლის ცინიზმს ასეთივე დამოკიდებულებით არ ეპასუხება.

დევიდ ტენანტი ბარტი კრაუჩ უმცროსის როლში — ჰარი პოტერი და ცეცხლოვანი თასი (2005)

ფოტო: Warner Bros.

"ჯოან როულინგი შესანიშნავი მწერალია, რომელმაც არაჩვეულებრივი ამბები შექმნა", — აცხადებს მსახიობი, — "მას ცუდს არაფერს ვუსურვებ, მაგრამ იქნებ საზოგადოებამ ხალხს არსებობა ვაცალოთ. უბრალოდ, გზას ნუ ვუღობავთ".

ჯოან როულინგი, კვლავაც ტრანსფობიის ბრალდებით, კრიტიკის ქარცეცხლში კიდევ ერთხელ გაეხვა ახლახან. მწერალმა სოციალურ ქსელში გამოაქვეყნა ფოტო, რომელშიც შამპანურითა და სიგარით აღნიშნავს დიდი ბრიტანეთის უზენაესი სასამართლოს გადაწყვეტილებას, ქალის იურიდიული განმარტება განისაზღვროს მისი დაბადებისას მინიჭებული სქესით. აღნიშნული განსაზღვრება ტრანსგენდერ ქალებს ქალებად არ ცნობს.

რა ხდება როულინგის თავს

ფოტო: Getty Images

იმის მიუხედავად, რომ ჰარი პოტერი წლების შემდეგაც რჩება ფანების საყვარელ ისტორიად, ბოლო წლებში საგის ავტორი, ჯოან როულინგი, კრიტიკის სამიზნეში არაერთხელ მოხვდა. მიზეზად დიდწილად მისი შეხედულებები იქცა — მწერალი ბევრჯერ დაადანაშაულეს ტრანსფობიაში.

თავდაპირველად, ამის საფუძველი მკვლევარ მაია ფორსტეიტერის დაცვა გახდა. ეს უკანასკნელი სამსახურიდან ტრანსფობიური განცხადების — "კაცებს ქალად გახდომა არ შეუძლიათ" — გამო დაითხოვეს. მოგვიანებით, როულინგმა ტვიტერზე დაწერა, რომ "ადამიანებისთვის, რომელთაც მენსტრუაცია აქვთ, შესაფერისი სიტყვა უკვე არსებობს". შემდეგ, მწერალი თავის დეტექტიურ რომანში ბოროტმოქმედად "ქალად გადაცმული კაცის" გამოყვანისთვის გააკრიტიკეს.

კრიტიკამ კი სხვადასხვაგვარი ფორმა მიიღო — ტიკტოკის მომხმარებლები ჰარი პოტერის წიგნებსაც კი წვავდნენ. 2021 წელს როულინგმა ტვიტერზე ასევე დაწერა, რომ თავისი სახლის მისამართი "სამმა აქტივისტმა" გაასაჯაროვა. ეს ფაქტი სოციალური ქსელის ადმინისტრაციამ და შოტლანდიის პოლიციამ აღკვეთეს, თუმცა, მწერლის თქმით, მან სიკვდილის მუქარებიც კი მიიღო.

ავტორისადმი "მიმართული სიძულვილის ტალღა" არაერთმა ცნობილმა ადამიანმა, მათ შორის, ჯადოსნური არსებების მსახიობმა ედი რედმეინმა დაგმო.

2021 წელს როულინგმა ტვიტერზე სტატიაა გააზიარა, სადაც ნათქვამი იყო, რომ "პოლიცია კაცის გენიტალიების მქონე გამაუპატიურებელს ქალად აღნიშნავს, თუკი თავდამსხმელი საკუთარ თავს ქალად აიდენტიფიცირებს".

"ომი მშვიდობაა. თავისუფლება ტყვეობაა. უგუნურება ძალაა. პენისიანი ინდივიდი, რომელმაც გაგაუპატიურა, ქალია", — დაწერა მწერალმა პოსტის აღწერაში.

მწერალთან გასამიჯნად ქვიდიჩის მსოფლიო ასოციაციებმაც გადაწყვიტეს სახელის შეცვლა. ავტორი დაადანაშაულეს ანტისემიტიზმშიც.

2022 წლის აგვისტოში, როცა მწერალ სალმან რუშდის აშშ-ში თავს დაესხნენ და ფიზიკურად გაუსწორდნენ, მოკვლით დაემუქრნენ ჯოან როულინგსაც.

ამ ყველაფრის მიუხედავად, ჰარი პოტერის სამყარო იზრდება: სულ მალე, ამ ზაფხულს, HBO პოტერიადის მიხედვით სერიალის გადაღებებს დაიწყებს.