ედი რედმეინმა, რომელიც ჰარი პოტერის სპინოფში, ჯადოსნური არსებები და სად ვიპოვოთ ისინი, მთავარ როლს ასრულებს, როულინგის ბოლოდროინდელ განცხადებებს მოყოლებული სიძულვილის ტალღა დაგმო. მისი თქმით, იგი შეშფოთებულია მწერლისადმი მიმართული "ლანძღვის კორიანტელით" და დასძენს, რომ როულინგის განცხადებებზე გამოხმაურება სოციალურ ქსელებში "სრულიად ამაზრზენია".

რედმეინი ჯადოსნური ცხოველების მესამე ფილმის გადასაღებ მოედანზე Daily Mail-ს ესაუბრა. ფილმის ერთ-ერთი სცენარისტი და თანაპროდიუსერი როულინგია. როგორც რედმეინი აღნიშნავს, მწერლის განცხადებების შემდეგ მან როულინგს პირადად მისწერა.

მიუხედავად ამისა, რედმეინმა ტრანსთემის წევრი თავისი მეგობრები და კოლეგები, რომელთაც "ყოველდღიურად უხდებათ დისკრიმინაციასთან გამკლავება", დაიცვა. მსახიობი დასძენს: "ამასთან, ინტერნეტსივრცეში ტრანსადამიანებისადმი მიმართული სიძულვილის და დამცირების საზიზღარი ტალღა კვლავ დაუცხრომელია, ტრანსთემის მდგომარეობა რეალურ სივრცეში კი — კიდევ უფრო მძიმე".

ფოტო: Warner Bros. Pictures

გასულ თვეებში ჰარი პოტერის შემქმნელი, ჯოან როულინგი, კრიტიკის ქარცეცხლში მას შემდეგ გაეხვა, რაც სოციალურ მედიაში ტრანსფობიური განცხადებები გააკეთა. მოგვიანებით, მან 2 000-სიტყვიანი ესე გამოაქვეყნა, სადაც განაცხადა, რომ ოჯახური ძალადობის მსხვერპლი იყო. ამავე ტექსტში მან გენდერისა და სქესის აღქმის საკითხებზე ისაუბრა, თუმცა ესეს კიდევ უფრო კრიტიკული გამოხმაურება მოჰყვა. მის საპასუხოდ ჰარი პოტერის ვარსკვლავებმა, მათ შორის ედი რედმეინმაც, ტრანსადამიანებისადმი მხარდასაჭერი განცხადებები გაავრცელეს.

"მე ვარ ის, ვისაც ორივესთან ჰქონია შეხება — როულინგთანაც და ტრანსთემის წევრებთანაც — ამიტომ, მსურს, ჩემი პოზიცია ღიად გამოვხატო. მე არ ვეთანხმები ჯოს შეხედულებებს. ტრანსგენდერი ქალები ქალები არიან, ტრანსგენდერი კაცები კი — კაცები; ასეთივე აღიარებას იმსახურებენ არაბინარული იდენტობის მქონე ადამიანებიც".

ედი რედმეინმა 2015 წელს ტომ ჰუპერის ფილმში დანიელი გოგო ტრანსგენდერი ქალი, მხატვარი ლილი ელბი, განასახიერა, რომელიც ერთ-ერთი პირველი იყო, ვინც სქესის შეცვლის ოპერაცია ჩაიტარა. მიუხედავად იმისა, რომ ცისგენდერი კაცის მიერ ტრანსგენდერი ქალის როლის შესრულების ფაქტი გააკრიტიკეს, რედმეინი ამ როლისთვის ოსკარზეც კი იყო წარდგენილი.

როულინგის განცხადებებს გამოეხმაურნენ დენიელ რედკლიფი, ემა უოტსონი, კეტი ლიუნგი და ევანა ლინჩიც. ყველა მათგანმა დაუფარავად გამოხატა საკუთარი მხარდაჭერა ტრანსადამიანებისადმი.