სახალხო დამცველის აპარატმა გაავრცელა ინფორმაცია, რომ აპარატის რწმუნებულმა 2025 წლის 24 იანვარს პენიტენციურ დაწესებულებაში პატიმრობაში მყოფი ნიკოლოზ კაცია მოინახულა.

სახალხო დამცველის წარმომადგენელმა დაკავებული ნიკოლოზ კაცია მას შემდეგ მოინახულა, რაც 23 იანვარს მთავარი არხის ეთერში დაკავებული საბა სხვიტარიძის დედამ, ლელა ახობაძემ თქვა, რომ ნიკა კაცია 3 დღის მშიერია და "საკვები როცა მიდის, მაინცდამაინც კაციაზე მთავრდება". მან ისიც თქვა, რომ ნიკა კაციას თანამესაკნე ჩაგრავს და მისთვის ჩარიცხულ თანხებს იყენებს.

სახალხო დამცველის აპარატის მიერ გავრცელებულ ინფორმაციაში ნათქვამია, რომ ბრალდებულმა პენიტენციურ დაწესებულებაში მისი უფლებების დარღვევის ფაქტებზე მიუთითა, რაზეც სახალხო დამცველმა შესაბამის სამართლებრივი რეაგირება მოახდინა.

"ასევე, ნიკოლოზ კაციას თხოვნით, მისი მდგომარეობის შესახებ ინფორმაცია მიეწოდა მისი კანონიერი ინტერესების დამცველ ადვოკატს.

სახალხო დამცველის აპარატი გააგრძელებს პატიმრების უფლებების დაცვის მდგომარეობაზე აქტიურ ზედამხედველობას", — ნათქვამია გავრცელებულ ინფორმაციაზე.

ამ ინფორმაციის გავრცელების შემდეგ, დაგვიკავშირდა სახალხო დამცველის აპარატის წარმომადგენელი და გვითხრა, რომ ჟურნალისტებმა არასწორად გაიგეს, "კაციას პრობლემები შეექმნა ერთ კონკრეტულ საკვებზე, რომელიც მას რამდენჯერმე არ დახვდა". აპარატში აცხადებენ, რომ საკითხს სწავლობენ და შესაბამისი რეაგირება ექნებათ.

ჟურნალისტი ნიკა კაცია 7 დეკემბერს დააკავეს. მას სისხლის სამართლის კოდექსის 260-ე მუხლის მე-6 ნაწილს ედავებიან, რაც დიდი ოდენობით ნარკოტიკული საშუალებების უკანანო შეძენა-შენახვას გულისხმობს. კაციას ბრალის დამტკიცების შემთხვევაში 8-დან 20-წლამდე ან უვადო პატიმრობა ემუქრება.