აშშ-სა და უკრაინას შორის საუდის არაბეთში გამართული მოლაპარაკებები დასრულდა — მხარეეები ერთობლივ განცხადებას აქვეყნებენ.

განცხადებაში ვკითხულობთ, რომ ორივე ქვეყნის წარმომადგენლებმა შეაქეს უკრაინელი ხალხის სიმამაცე საკუთარი ქვეყნის დაცვის საქმეში და დროა, დაიწყოს მუშაობა ხანგრძლივი მშვიდობის მისაღწევად.

უკრაინულმა დელეგაციამ მადლიერება გამოხატა აშშ-ის პრეზიდენტის, კონგრესისა და ხალხის მიმართ მშვიდობისკენ ნაბიჯების გადადგმის შესაძლებლობისთვის. უკრაინამ ასევე გამოთქვა მზაობა, მოაწეროს ხელი დაუყოვნებლივ, 30-დღიან ცეცხლის შეწყვეტის შეთანხმებას, რომელიც მხარეთა შეთანხმებით შესაძლოა გაგრძელდეს — მისი ამოქმედება რუსეთის ფედერაციის თანხმობაზეა დამოკიდებული. რუსულ მხარეს აშშ დაეკონტაქტება.

განცხადებაში ასევე ვკითხულობთ იმას, რომ აშშ დაუყოვნებლივ მოხსნის პაუზას უკრაინისათვის სადაზვერვო ინფორმაციის მიწოდებაზე და ამ მიმართულებით სრულყოფილ თანამშრომლობას განაგრძობს.

დელეგაციებმა განიხილეს ჰუმანიტარული საკითხებიც, კერძოდ, ცეცხლის შეწყვეტის პირობებში ტყვეთა გაცვლისა და გატაცებული უკრაინელი ბავშვების უკან დაბრუნების საკითხები.

ორივე დელეგაცია თანახმაა, დაასახელოს მოლაპარაკებაში ჩართული გუნდები და დაიწყოს მუშაობა მშვიდობაზე, რომელიც უკრაინას ხანგრძლივ უსაფრთხოებას მოუტანს. შეერთებული შტატები რუსეთის წარმომადგენლებთან კონკრეტული შეთავაზებების განსახილველად მზადაა. უკრაინულმა მხარემ ხაზი გაუსვა, რომ პროცესში ევროპელი პარტნიორებიც უნდა იყონ ჩართული.

ბოლოს, ორივე ქვეყნის პრეზიდენტი მზადაა, ხელი მოაწეროს შეთანხმებას უკრაინის კრიტიკული მინერალების რესურსების განვითარების შესახებ, აშშ-ის პარტნიორობით ქვეყნის ეკონომიკის გასაფართოვებლად და უკრაინის ხანგრძლივი მშვიდობის უზრუნველსაყოფად.

"ახლა ბურთი რუსეთის მოედანზეა უკრაინაში მშვიდობის დასამყარებლად", — განაცხადა მარკო რუბიომ.