აშშ-ის პრეზიდენტ დონალდ ტრამპის სპეციალური წარმომადგენლის, კიტ კელოგისა და უკრაინის პრეზიდენტ ვოლოდიმირ ზელენსკის ერთობლივი პრესკონფერენცია აღარ გაიმართება — გავრცელებული ცნობებით, გადაწყვეტილება ამერიკულმა მხარემ მიიღო კიევსა და თეთრ სახლს შორის ურთიერთობების დაძაბვის პარალელურად.

უკრაინის პრეზიდენტის პრესმდივნის, სერგეი ნიკიფოროვის თქმით, პრეზიდენტ ვოლოდიმირ ზელენსკისა და უკრაინისა და რუსეთის საკითხებში აშშ-ის სპეციალური წარმომადგენლის, კიტ კელოგის ერთობლივი კონფერენცია ამერიკული მხარის მოთხოვნით არ ჩატარდება.

19 თებერვალს დონალდ ტრამპმა ვოლოდიმირ ზელენსკის "დიქტატორი" უწოდა და არჩევნების დანიშვნისკენ მოუწოდა — უფრო ადრე, ზელენსკიმ აშშ-ის პრეზიდენტი "დეზინფორმაციულ სივრცეში მოხვედრილად" მოიხსენია.

დონალდ ტრამპის გაღიზიანება გამოიწვია უკრაინის უარმა ე.წ "მინერალების შეთანხმებაზე", რომლის თანახმადაც, უკრაინას აშშ-ის მიერ გაწეული სამხედრო-ფინანსური დახმარების სანაცვლოდ ქვეყნის წიაღისეული მინერალების 50% უნდა დაეთმო.

ასევე იხილეთ: ტრამპმა ზელენსკი დიქტატორად მოიხსენია და არჩევნების დანიშვნისკენ მოუწოდა