"ერდოღანს ესმის უკრაინის NATO-ში გაწევრიანების მნიშვნელობა, მან პირადად გამოხატა მხარდაჭერა უკრაინის NATO-ში გაწევრიანების მიმართ," – ამის შესახებ უკრაინის პრეზიდენტმა, ვოლოდიმირ ზელენსკიმ ოთხშაბათს თურქულ მედიას განუცხადა.

18 თებერვალს, უკრაინის პრეზიდენტი, ვოლოდიმირ ზელენსკი ანკარაში თურქეთის პრეზიდენტს რეჯეფ თაიიფ ერდოღანს შეხვდა. France 24-ის თქმით, ზელენსკიმ Telegram-ზე განაცხადა, რომ ერდოღანთან პატიმრების გაცვლასა და სხვა საკითხებს განიხილავდა. ამ შეხვედრის პარალელურად, აშშ-ისა და რუსეთის უმაღლესი დიპლომატები საუდის არაბეთში პირველ მაღალი დონის მოლაპარაკებებს მართავდნენ.

ერდოღანის მთავარმა თანაშემწემ, ფაჰრეთინ ალტუნმა განაცხადა, რომ შეხვედრაზე განიხილეს, როგორ უნდა გააძლიერონ თანამშრომლობა ორ ქვეყანას — უკრაინასა და თურქეთს შორის.

ვოლოდიმირ ზელენსკიმ ასევე განაცხადა, რომ მაშინ, როცა ევროპული ქვეყნების აბსოლუტური უმრავლესობა მხარს უჭერს უკრაინის NATO-ში გაწევრიანებას, სლოვაკეთი, უნგრეთი, გერმანია და აშშ ამას ეწინააღმდეგებიან.