"უკრაინის გვერდით ვდგავართ და პასუხისმგებლობას ავიღებთ ევროპაში მშვიდობისა და უსაფრთხოების უზრუნველსაყოფად. ეს საფრანგეთის ფუნდამენტური ინტერესია და მე ვარ მისი გარანტორი," — განაცხადა საფრანგეთის პრეზიდენტმა, ემანუელ მაკრონმა, ევროპელ და კანადელ ლიდერებთან გამართული შეხვედრის შემდეგ.

მაკრონი განცხადებაში საუბრობს, რომ ის იზიარებს დონალდ ტრამპის პოზიციას, რომ unda დასრულდეს აგრესიული ომი, რომელსაც რუსეთი 3 წელია აწარმოებს და საფრანგეთის ფუნდამენტური ინტერესია უკრაინაში მშვიდობა გრძელვადიანი იყოს.

პრეზიდენტმა ასევე დასძინა, რომ უკრაინა ყოველთვის უნდა მონაწილეობდეს მოლაპარაკებებში და მის უფლებებს პატივი უნდა სცენ.

"კიდევ ერთი გრძელი საუბარი მქონდა რამდენიმე კოლეგასთან ევროკავშირიდან, ასევე, კანადიდან, ისლანდიიდან და ნორვეგიიდან. საფრანგეთისა და მისი პარტნიორების პოზიცია ნათელი და ერთიანია. ხანგრძლივი და მყარი მშვიდობა გვსურს უკრაინაში.

უკრაინის გვერდით ვდგავართ და პასუხისმგებლობას ავიღებთ ევროპაში მშვიდობისა და უსაფრთხოების უზრუნველსაყოფად. ეს საფრანგეთის ფუნდამენტური ინტერესია და მე ვარ მისი გარანტორი.

ამ მიზანს ვიზიარებთ პრეზიდენტ დონალდ ტრამპთან, რომ დავასრულოთ აგრესიული ომი, რომელსაც რუსეთი თითქმის სამი წელია აწარმოებს.

მშვიდობისთვის ჩვენი ძალისხმევები შემდგომი პრინციპების თანახმად გაგრძელდება, ჩვენს ინტერესებშია:

უკრაინა ყოველთვის უნდა მონაწილეობდეს [მოლაპარაკებებში] და მის უფლებებს პატივი უნდა ეცეს.

მშვიდობა ხანგრძლივი უნდა იყოს და თან ახლდეს მტკიცე და სანდო გარანტიები.

ევროპული უსაფრთხოების ინტერესები გათვალისწინებულ უნდა იქნას.

დარწმუნებულები ვართ, რომ ევროპისთვისა და თითოეული ჩვენი ქვეყნისთვის საჭიროა ჩვენი თავდაცვისა და უსაფრთხოების ხარჯებისა და შესაძლებლობების გაზრდა.

გადაწყვეტილებები მომავალ დღეებსა და კვირებში იქნება მიღებული," — განაცხადა მაკრონმა.

მაკრონის ინიციატივით გამართულ შეხვედრაში მონაწილეობას იღებდნენ: რუმინეთი, ლუქსემბურგი, ლიეტუვა, კვიპროსი, ფინეთი, ბელგია, ბულგარეთი, კანადა, ხორვატია, ესტონეთი, საბერძნეთი, ირლანდია, ისლანდია, ლატვია, ნორვეგია, პორტუგალია, შვედეთი, სლოვენია და ჩეხეთი.

ცნობისთვის, 17 თებერვალს ევროპელი ლიდერების პარიზში გამართული შეხვედრაში ემანუელ მაკრონის გარდა მონაწილეობას იღებდნენ: კირ სტარმერი (დიდი ბრიტანეთის პრემიერ-მინისტრი), ოლაფ შოლცი (გერმანიის კანცლერი), ჯორჯა მელონი (იტალიის პრემიერ-მინისტრი), პედრო სანჩესი (ესპანეთის პრემიერ-მინისტრი), დიკ სხოფი (ნიდერლანდების პრემიერ-მინისტრი), მეტე ფრედერიკსენი (დანიის პრემიერ-მინისტრი), მარკ რუტე (ნატოს გენერალური მდივანი), ურსულა ფონ დერ ლაიენი (ევროკომისიის პრეზიდენტი) და ანტონიო კოსტა (ევროპული საბჭოს პრეზიდენტი).