ერ-რიადში მოსკოვისა და ვაშინგტონის წარმომადგენლებს შორის 4-საათიანი შეხვედრის შემდეგ დონალდ ტრამპმა განაცხადა, რომ ომის დაწყებაში თავად კიევი იყო დამნაშავე და შეეძლო დიდი ტერიტორიისა და მსხვერპლის გარეშე რუსეთს გარიგებოდა. ამის შესახებ Euronews წერს.

აშშ-ს სახელმწიფო მდივან მარკო რუბიოს თქმით, თუ შესაძლებელი იქნება რუსეთ-უკრაინის კონფლიქტის დასრულებაზე შეთანხმება, ეს აშშ-ს "რუსებთან პარტნიორობის წარმოუდგენელ შესაძლებლობებს" გაუხსნის.

CNN წერს, რომ ტრამპმა მოლაპარაკებები "ძალიან კარგად" შეაფასა და თქვა, რომ რუსეთს "სურს გააკეთოს რაღაც".

აშშ-ის პრეზიდენტმა, დონალდ ტრამპმა საუდის არაბეთში მოლაპარაკებებზე უკრაინის დელეგაციის არყოფნის კომენტირებისას თქვა, რომ უკრაინა 3 წლის წინ მონაწილეობდა მოლაპარაკებებზე და ომი მაშინ უნდა დასრულებულიყო. მისივე თქმით ომის დაწყებაში თავად კიევია დამნაშავე.

"ვფიქრობ, რომ მაქვს ძალა, დავასრულო ეს ომი. დღეს გავიგონე: "აჰ, ჩვენ არ მიგვიწვიეს". კარგი, სამი წელია იქ ხართ. სამი წლის განმავლობაში უნდა დაგესრულებინათ. არასდროს უნდა დაგეწყოთ ის. შეგეძლოთ გარიგება დაგედოთ", — აღნიშნა ტრამპმა მარ-ა-ლაგოს რეზიდენციაში გამართულ პრესკონფერენციაზე.

Euronews წერს, რომ ასეთი კომენტარები და ამერიკის პრეზიდენტის სურვილი, გააუმჯობესოს ურთიერთობები მოსკოვთან, შეიძლება ძვირად დაუჯდეს ტრანსატლანტიკურ ალიანსს აშშ-სა და ევროპას შორის ურთიერთობაში და მნიშვნელოვნად შეარყიოს ვაშინგტონის პოზიცია უკრაინასთან, ისევე როგორც სხვა ქვეყნებთან.

"ცუდ მოლაპარაკებებსაც კი შეეძლო წლების წინ მოეგვარებინა ეს დიდი ტერიტორიების დაკარგვის და სიცოცხლის დაკარგვის გარეშე", — თქვა ტრამპმა და კვლავ გაიმეორა მისი მტკიცება, რომ მას უკრაინაში რუსეთის შეჭრის შეჩერება შეეძლო.

სამშაბათს ერ-რიადში მოლაპარაკებებზე არც უკრაინა და არც ევროპული ქვეყნები არ იყვნენ მიწვეული, მაგრამ ამერიკელმა ოფიციალურმა პირებმა განაცხადეს, რომ ისინი არ აპირებენ სამშვიდობო მოლაპარაკებებიდან ევროპის გამორიცხვა.

"არავინაა უკანა პლანზე", — თქვა აშშ-ს სახელმწიფო მდივანმა მარკო რუბიომ, "ცხადია, იქნება მოლაპარაკებები და კონსულტაციები უკრაინასთან, ჩვენს პარტნიორებთან ევროპაში და სხვაგან. მაგრამ, საბოლოო ჯამში, რუსული მხარე იქნება შეუცვლელი ამ პროცესის გადაწყვეტაში".

ტრამპის მრჩეველმა ეროვნული უსაფრთხოების საკითხებში მაიკ უოლცმა აღნიშნა, რომ ტრამპი უკრაინის პრეზიდენტ ვოლოდიმირ ზელენსკის, გასულ კვირას, პუტინთან საუბრის შემდეგ ესაუბრა და ზელენსკი აშკარად გაღიზიანებული იყო შეხვედრაზე არ მიწვევით.

ზელენსკიმ 17 თებერვალს განაცხადა, რომ მისი ქვეყანა არასდროს დათანხმდება სამშვიდობო პირობებს, რომელთა შემუშავებაშიც უკრაინა არ იქნება ჩართული. დონალდ ტრამპის განცხადებით, უკრაინა გაფართოებულ პროცესში ჩართული ნამდვილად იქნება.

ერ-რიადიში რუსეთისა და აშშ-ს წარმომადგენლების შეხვედრის შემდეგ კომენტარი გააკეთა რუსეთის საგარეო საქმეთა სამინისტროს პრესსპიკერმა, მარია ზახაროვამაც. მისი თქმით, უკრაინის NATO-ში გაწევრიანება რუსეთისთვის მიუღებელია და ჩრდილოატლანტიკურმა ორგანიზაციამ უკან უნდა წაიღოს 2008 წელს ბუქარესტის სამიტზე გაცემული პირობა იმის შესახებ, რომ უკრაინა ორგანიზაციის წევრი აუცილებლად გახდება.

სავარაუდოდ, ბუქარესტის სამიტის პირობის გაუქმებაში მოიაზრება საქართველოც, რომელმაც, როგორც უკრაინამ, ანალოგიური გარანტია 2008 წლის აპრილში მიიღო.

"უკრაინის NATO-ში გაწევრიანება ჩვენთვის მიუღებელია. ეს ჩვენს უსაფრთხოებას სერიოზულ საფრთხეს შეუქმნის და მთელი ევროპისთვის კატასტროფულ შედეგებს გამოიწვევს. ალიანსმა ბუქარესტის 2008 წლის სამიტის დაპირებები უნდა უარყოს, რომელიც მომავალში უკრაინის ჩრდილო-ატლანტიკურ ბლოკში გაწევრიანების გარანტიას უზრუნველყოფდა", — განაცხადა მარია ზახაროვამ.