"კანონის უზენაესობის ცენტრმა" (RLC) სამართალდამცავი ორგანოების საქმიანობის შეფასების ანგარიშში გამოაქვეყნა, რომელშიც გაანალიზებულია ევროკავშირში საქართველოს გაწევრიანების პროცესის შეჩერების შემდგომ სამართალდამცავთა მიერ ჩადენილ დანაშაულებზე სახელმწიფოს ნულოვანი რეაგირება და აქციის მონაწილეთა მიმართ განხორციელებული რეპრესიები.

ანგარიშში ვკითხულობთ, რომ სამართალდამცავების მხრიდან ძალადობა კოორდინირებული და სისტემური იყო და 2024 წელს არ დასჯილა არც ერთი სამართალდამცავი სამსახურებრივი მოვალეობის შესრულებისას ჩადენილი დანაშაულისთვის. ანგარიშში ასევე ხაზგასმულია, რომ სახელმწიფო ყოველ მომდევნო წელს უფრო ლოიალური ხდება კანონდამრღვევი და დანაშაულის ჩამდენი სამართალდამცავების მიმართ.

"ჩატარებულმა კვლევამ აჩვენა, რომ:

სახელმწიფოს მხრიდან აქციის მონაწილეები, ისევე როგორც ჟურნალისტები დაექვემდებარნენ სისტემურ ძალადობას, არასათანადო მოპყრობას, წამებას, არაპროპორციული ძალის გამოყენებას;

სამართალდამცავთა მხრიდან დანაშაულის ჩადენა იყო კოორდინირებული და სისტემური;

სახელმწიფომ არ აწარმოვა ეფექტიანი გამოძიება არც რიგითი სამართალდამცავების და არც ხელმძღვანელი პირების მიმართ. არ დასაჯა არც ერთი სამართალდამცავი;

ყოველ მომდევნო წელს, სახელმწიფო უფრო ლოიალური ხდება კანონდამრღვევი და დანაშაულის ჩამდენი სამართალდამცავების მიმართ;

2024 წელს არ დასჯილა არც ერთი სამართალდამცავი სამსახურებრივი მოვალეობის შესრულებისას ჩადენილი დანაშაულისთვის;

შემცირებულია პოლიციელთა დისციპლინური დასჯის მაჩვენებელიც. 2024 წელს ამ ციფრმა ისტორიულ მინიმუმს მიაღწია ბოლო 10 წლის განმავლობაში;

ამის პარალელურად, სახელმწიფო ატარებდა რეპრესიულ პოლიტიკას აქციის მონაწილეების მიმართ;

აქციის მონაწილეთა მიმართ სახელმწიფომ აქტიურად გამოიყენა ადმინისტრაციულ პასუხისგებაში მიცემისა და სისხლისსამართლებრივი დევნის ყველაზე მკაცრი მექანიზმები;

აქციის მონაწილეთა მიმართ ადმინისტრაციული და სისხლის სამართლის საქმეები ნაწარმოებია კანონის არსებითი დარღვევებით;

ამ პროცესში სამართალდამცავი ორგანოები ასრულებდნენ გადამწყვეტ როლს. ისინი სრულად ექვემდებარებოდნენ მმართველ პარტიას და გვევლინებოდნენ მათი პოლიტიკური დავალებების უპირობო შემსრულებლებად.

ანგარიში საერთაშორისო ორგანიზაციების, დიპლომატიური კორპუსისა და არასამთავრობო სექტორის წარმომადგენლებს, ასევე პოლიტიკოსებს წარედგინა. პრეზენტაციას ასევე, ესწრებოდნენ ადვოკატები, რომლებიც სამართლებრივ დახმარებას უწევენ აქციის მონაწილეებს.

ღონისძიებას სამოქალაქო საზოგადოების ფონდის დირექტორი, ქეთი ხუციშვილი და კანონის უზენაესობის ცენტრის ხელმძღვანელი. ლონდა თოლორაია უძღვებოდნენ," — ნათქვამია გავრცელებულ ინფორმაციაში.