"ათეულობით პოლიციელი დაესხა თავს ნიკას, იქცეოდნენ, როგორც კრიმინალები", — ადვოკატმა გიორგი კონდახიშვილმა ტვ პირველის ეთერში კოალიცია ცვლილებისთვის ლიდერის, ნიკა მელიას დაკავების გარემოებებზე ისაუბრა.

მისი თქმით, მელია "სამარშრუტო მანქანაში დააგდეს იატაკზე, სადაც დაახლოებით ათმა პოლიციელმა ძალადობით, შეურაცხყოფით წაართვა ტელეფონი".

"საპატრულო პოლიცია იყო გამოყენებული ინფორმაციის მისაღებად, როგორც კი გააჩერეს და დარწმუნდნენ, რომ ნიკა იჯდა მანქანაში, გადასცეს რაციაზე, რომ ობიექტი მანქანაშია... ამის შემდგომ, ოთხივე კარი ერთდროულად გაიღო და წარმოუდგენელი ხდებოდაო. ალბათ განგებ იყო შერჩეული ისეთი ადგილი, სადაც სავარაუდოდ არავითარი გარე სათვალთვალო კამერები არ არის, ლისის მიმდებარედ, სადაც უკვე გადასახვევია. თვითონ მანქანაში დამონტაჟებული ვიდეოსათვალთვალო კამერა კი მოგლიჯეს...

ათეულობით პოლიციელი დაესხა თავს ნიკას, იქცეოდნენ, როგორც კრიმინალები, სამარშრუტო მანქანაში დააგდეს იატაკზე, სადაც დაახლოებით ათმა პოლიციელმა ძალადობით, შეურაცხყოფით წაართვა ტელეფონი, ცდილობდნენ ტელეფონიდან ინფორმაციის მიღებას, ვინაიდან FACE ID უყენია, ცდილობდნენ მის სახეზე მინათებას, მაგრამ ვერ გახსნეს," — ამბობს კონდახიშვილი.

ადვოკატი ტვ პირველთან ამბობს, რომ ნიკა მელიას სამართალდამცავი ორგანოს წარმომადგენლები "ყოველ ხუთ წუთში უღებდნენ ვიდეოს და უგზავნიდნენ ხელმძღვანელს".

"მას მოექცნენ როგორც უკანასკნელ კრიმინალს, არავითარი განმარტება, არავითარი ზარის უფლება, მიაყენეს ფაქტობრივად შეურაცხყოფა, დააგდეს სამარშრუტო ტაქსის იატაკზე, მას აქვს დაზიანებები მაჯის არეში. იქცეოდნენ როგორც ველურებიო — ნიკა ასე გადმოსცემს, თვითონაც არის გაოგნებული.

ყოველ ხუთ წუთში უღებდნენ ვიდეოს და უგზავნიდნენ ხელმძღვანელს, ალბათ, ეს ახალი გატაცებაა, რომ დაკავებულ პირს უღებენ ვიდეოს და ვიღაცას ანიჭებს სიამოვნებას ამ კადრებით.

ორივე მაჯის არეში აქვს დაზიანება, ვინაიდან, სანამ არ შეიყვანეს შენობაში ძალიან მჭიდროდ ჰქონდა მოჭერილი...

ნიკას გზავნილი არის ბრძოლა ბოლომდე, ღიმილისმომგვრელია მისთვისაც ამგვარი გავეშებული ქმედება შინაგან საქმეთა სამინისტროსი. აუხსნელია ეს ყველაფერი. თუ ამას ვიღაც ცხელთავიანი აკეთებდა იმისთვის, რომ ხვალ ნიკას დაპატიმრება ყოფილიყო მშვიდ ვითარებაში, მე მგონი, კონტრპროდუქტიულია ეს ყველაფერი, წარმოუდგენელია, პოლიტიკურ ლიდერს აკავებდე უსაფუძვლოდ, პრევენციის მიზნით, არღვევდე კანონს, კრიმინალურ დავალებას აძლევდე შინაგან საქმეთა სამინისტროს და ამის შემდგომ ელოდო, რომ ამასთან დაკავშირებით ადამიანებს არ ექნებათ რეაქცია," — ამბობს ადვოკატი TV პირველთან (კომენტარს ტაბულა ავრცელებს).

შეგახსენებთ, რომ კოალიცია ცვლილებისთვის ერთ-ერთი ლიდერი, ნიკა მელია 29 მაისს, საღამოს, ლისის ტბის ასახვევთან დააკავეს. ის დიღმის მთავარ სამმართველოშია გადაყვანილი. შსს-ს ცნობით, ნიკა მელია ადმინისტრაციული წესით, სამართალდამცავი ორგანოს შეურაცხყოფისთვისაა დაკავებული.

ნიკა მელიას ქართული ოცნების პარლამენტის დროებით საგამოძიებო კომისიაზე გამოუცხადებლობას ედავებიან. მელიას სასამართლო დღეს, 30 მაისს, 14:00-ზეა ჩანიშნული. პოლიტიკოს გირაოს გადახდის ვადა 29 მაისს ამოეწურა. მანამდე ის აცხადებდა, რომ სასამართლოზე მისვლას არ აპირებდა.

ნიკა მელიას ბრალდება სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. ამ მუხლით ბრალდებული ყოფილი თავდაცვის მინისტრი ირაკლი ოქრუაშვილი და "კოალიცია ცვლილებებისთვის" ლიდერი ზურაბ გირჩი ჯაფარიძე დაკავებული არიან