დღეს, 29 მაისს "თანაინვესტირების ფონდის" ყოფილი ხელმძღვანელის, გიორგი ბაჩიაშვილის სასამართლო პროცესი გაიმართა. ბაჩიაშვილმა პროცესზე გაიხსენა, თუ როგორ "გაიტაცეს" ის და როგორ ჩამოიყვანეს "ჯორჯიან ეარვეისის" თვითმფრინავით საქართველოში.

"შაბათს, 24 მაისს, მე გამიტაცეს საზღვარგარეთიდან, თვალები ამიხვიეს, ადვოკატის, პროკურორის, მოსამართლის, ოჯახის შეტყობინების და დაკავშირების გარეშე. შემდეგ მოტაცებული ჩამტენეს "აირზენას" თვითმფრინავში და ყველანაირი ახსნა-განმარტების გარეშე, ყველა კანონის დარღვევით ჩამომიყვანეს საქართველოში," — განაცხადა ბაჩიაშვილმა.

ავიაკომპანია "ჯორჯიან ეარვეისი" მოვლენებს განცხადებით გამოეხმაურა.

კომპანია აცხადებს, რომ შეუძლებელია ნებისმიერი საერთაშორისო აეროპორტიდან ნებისმიერი მოქალაქის ნებისმიერი ავიაკომპანიის ბორტზე მოხვედრა ან გამგზავრება არაკანონიერი გზით. რაც შეეხება ინფორმაციას, ვინ დაიქირავა მათი VIP ბორტი, კომპანიამ განაცხადა, რომ "კერძო პირების მიერ შეკვეთილი რეისების შესახებ ინფორმაციას ვერ გაასაჯაროვებენ".

"ავიაკომპანია "ჯორჯიან ეარვეისი" მინიმუმ 3-4 ჯერ კვირაში ასრულებს კერძო პირების და სხვა სტრუქტურების მიერ შეკვეთილ ჩარტერულ რეისებს. აღნიშნული ჩარტერული რეისების შეკვეთებს აფორმებს ავიაკომპანიის კომერციული განყოფილება. კერძო პირების მიერ შეკვეთილი რეისების შესახებ ინფორმაცია წარმოადგენს პერსონალურ ინფორმაციას, რაც დაცულია კანონის მიერ და მისი გაცემის უფლება კომპანიას არ აქვს.

გვსურს მკაფიოდ განვაცხადოთ, რომ შეუძლებელია ნებისმიერი საერთაშორისო აეროპორტიდან ნებისმიერი მოქალაქის ნებისმიერი ავიაკომპანიის ბორტზე მოხვედრა ან გამგზავრება არაკანონიერი გზით. აღნიშნულ პროცესს ბევრი შესაბამისი სტრუქტურა აკონტროლებს და მსგავსი ბრალდებები სრულიად უსაფუძვლოა და აზრს მოკლებულია," — აღნიშნულია ინფორმაციაში.

BM.ge-ს ინფორმაციით, "ჯორჯიან ეარვეისის" VIP ბორტს ფრენის 2/3-ზე გამორთული ჰქონდა სანავიგაციო გადამცემი, შესაბამისად უცნობია რომელი ქვეყნიდან გამოფრინდა აღნიშნული ბორტი.

"აღსანიშნავია, რომ 26 მაისს აბუ-დაბიში GMT დროით 12:39-ზე, ანუ ადგილობრივი დროით 15:23-ზე დაეშვა "ჯორჯიან ეარვეისის" VIP ბორტი. 4L-TGB ხომალდს ფრენის 2/3-ზე გამორთული ჰქონდა სანავიგაციო გადამცემი და ის მხოლოდ სპარსეთის ყურის თავზე დაფრენამდე 20 წუთით ადრე ჩართო, შესაბამისად, საჯარო მონაცემთა ბაზაში არ იძებნება ინფორმაცია რომელი ქვეყნიდან გამოფრინდა აღნიშნული ბორტი," — წერს BM.ge.

შეგახსენებთ, 4 მარტს გიორგი ბაჩიაშვილმა დაწერა, რომ საქართველოდან იძულებით წავიდა. თანაინვესტირების ფონდის ყოფილი დირექტორს ბრალი საერთო ჯამში სისხლის სამართლის 3 საქმეზე აქვს წარდგენილი — მათ შორის ქართული ოცნების დამფუძნებლის, ბიძინა ივანიშვილის კუთვნილი კრიპტოვალუტის მითვისებისთვისაც.