როცა პატარა სოფელში პენსიაზე გადიხარ, სადარდებელი და საფიქრალი ბევრი აღარაფერი გრჩება. ასე რომ, თავშესაქცევად ალბათ გამომძიებლობაზეც არ იტყვი უარს...

ხუთშაბათის მკვლელობის კლუბი — ასე ჰქვია ნეტფლიქსის ახალ დეტექტიურ ფილმს, სადაც პენსიაზე გასული ოთხი ადამიანი სწორედ მკვლელობის გამოსაძიებლად გაერთიანდება. ყოფილი ჯაშუში ელიზაბეთი, პროფკავშირის ყოფილი ხელმძღვანელი რონი, ყოფილი ფსიქიატრი იბრაჰიმი და ყოფილი მედდა ჯოისი მოყვარულ გამომძიებელთა კლუბს მას შემდეგ ჩამოაყალიბებენ, რაც ინგლისის ერთ-ერთ სოფელს ახალგაზრდა ქალის მკვლელობა შეძრავს.

ფილმის ტრეილერი სულ ახლახან გავრცელდა:

ხუთშაბათის მკვლელობის კლუბში, რომელიც რიჩარდ ოსმანის ამავე სახელწოდების ბესტსელერ რომანს ეფუძნება, მთავარ როლებს ჰელენ მირენი, პირს ბროსნანი, ბენ კინგსლი და სელია იმრი ასრულებენ. ფილმის რეჟისორი ჰარი პოტერისა და Home Alone-ის შემქმნელი კრის კოლამბუსია.

"ეს საუკეთესო სამსახიობო გუნდია, რომელთანაც ჰარი პოტერის შემდეგ მიმუშავია", — აცხადებს კოლამბუსი, — "არაჩვეულებრივად მომზადებული არიან, რადგან ყველგან თამაშობენ: თეატრშიც, სერიალებშიც, ფილმებშიც. ყველა სახის კუნთი გავარჯიშებული აქვთ".

ფილმის პრემიერა ნეტფლიქსზე 28 აგვისტოს შედგება.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...