ერ-რიადში რუსეთისა და აშშ-ს დელეგაციების მოლაპარაკებები დასრულდა. რუსეთ-ამერიკის მოლაპარაკებები 4,5 საათს გაგრძელდა.

რუსული მხარიდან შეხვედრას ესწრებოდნენ: რუსეთის საგარეო საქმეთა მინისტრი სერგეი ლავროვი, რუსეთის პირდაპირი ინვესტიციების ფონდის (RDIF) ხელმძღვანელი კირილ დმიტრიევი და რუსეთის პრეზიდენტის თანაშემწე იური უშაკოვი.

რუსულ მედიასთან იური უშაკოვი ამბობს, რომ შეხვედრაზე საუბარი რუსეთ-უკრაინის ომს შეეხო.

"დიახ, ჩვენ განვიხილეთ [ეს თემა] და გამოვკვეთეთ ჩვენი ფუნდამენტური მიდგომები და შევთანხმდით, რომ მოლაპარაკებების მონაწილეების ცალკეული ჯგუფები თავის დროზე ჩაერთვებიან პროცესში", — თქვა უშაკოვმა.

მისი თქმით, განიხილეს ვლადიმერ პუტინისა და დონალდ ტრამპის შესაძლო შეხვედრაც, მაგრამ მომავალ კვირაში ეს ნაკლებად სავარაუდოა.

უშაკოვმა საუბარს "ძალიან სერიოზული" უწოდა. მისი აზრით, მოლაპარაკებებს ცუდად არ ჩაუვლია.

"ჩვენ შევთანხმდით, რომ გავითვალისწინოთ ერთმანეთის ინტერესები და ამავდროულად გავაძლიეროთ ორმხრივი ურთიერთობები.”ამით დაინტერესებულია მოსკოვიც და ვაშინგტონიც", — თქვა უშაკოვმა.

კითხვაზე, ახლოვდებიან თუ არა რუსეთი და შეერთებული შტატები, მან თქვა, რომ ჯერჯერობით "ძნელი სათქმელია, მაგრამ იყო ამაზე საუბარი".

ამერიკული მხარიდან შეხვედრას ესწრებოდნენ — აშშ-ის სახელმწიფო მდივანი მარკო რუბიო, აშშ-ის მრჩეველი ეროვნული უსაფრთხოების საკითხებში მაიკ უოლცი და აშშ-ის პრეზიდენტის სპეციალური წარმომადგენელი ახლო აღმოსავლეთში სტივ ვიტკოფი,

აშშ-ს სახელმწიფო დეპარტამენტის სპიკერმა, ტამი ბრიუსმა თქვა, რომ მოლაპარაკებების დროს მოსკოვი და ვაშინგტონი შეთანხმდნენ, "შექმნან საკონსულტაციო მექანიზმი", რომელიც აღმოფხვრის ორმხრივ ურთიერთობებს შემაფერხებელ ფაქტორებს. გარდა ამისა, მხარეები შესაბამის ჯგუფებს შექმნიან, რათა დაიწყონ რუსეთ-უკრაინის ომის საკითხის გადაწყვეტა "რაც შეიძლება მალე".

დელეგაციები შეთანხმდნენ, რომ საფუძველი ჩაეყარა "ორმხრივი გეოპოლიტიკური ინტერესის საკითხებზე სამომავლო თანამშრომლობას".

"ერთი სატელეფონო ზარი, რომელსაც მოჰყვება ერთი შეხვედრა, არ არის საკმარისი ხანგრძლივი მშვიდობის დასამყარებლად. ჩვენ უნდა ვიმოქმედოთ და დღეს ჩვენ გადავდგით მნიშვნელოვანი ნაბიჯი", — განაცხადა სახელმწიფო დეპარტამენტის სპიკერმა.

აშშ-ს სახელმწიფო დეპარტამენტის განცხადების მიხედვით, მხარეები შემდეგ საკითხებზე შეთანხმდნენ:

"ჩამოყალიბდეს საკონსულტაციო მექანიზმი, რათა მოგვარებული იყოს ორმხრივ ურთიერთობაში გამაღიზიანებელი ფაქტორები იმ მიზნით, რომ გადაიდგას საჭირო ნაბიჯები ჩვენი შესაბამისი დიპლომატიური მისიების საქმიანობის ნორმალიზებისთვის;

დაინიშნოს შესაბამისი მაღალი დონის ჯგუფები, რათა რაც შეიძლება სწრაფად დაიწყოს მუშაობა უკრაინაში კონფლიქტის დამთავრების გზაზე ისე, რომ ეს იყოს მდგრადი, გრძელვადიანი და მისაღები ყველა მხარისთვის;

საფუძველი ჩაეყაროს სამომავლო თანამშრომლობას საერთო გეოპოლიტიკური ინტერესის მქონე საკითხებზე, ასევე ისტორიულ ეკონომიკურ და საინვესტიციო შესაძლებლობებზე, რაც უკრაინაში კონფლიქტის წარმატებით დასრულების შედეგად აღმოცენდება;

მხარეები დღევანდელ შეხვედრაზე პირობას დებენ, შეინარჩუნონ ერთმანეთთან წვდომა, რათა გარანტირებული იყოს, რომ პროცესი წინ დროულად და პროდუქტიულად წავიდეს".

უკრაინის პრეზიდენტმა ვლადიმირ ზელენსკიმ განაცხადა, რომ კიევი არ აღიარებს რიადში რუსეთსა და შეერთებულ შტატებს შორის მოლაპარაკების შედეგებს.