გასულ კვირას, დასავლეთ ევროპის დიდი ნაწილი, განსაკუთრებით საფრანგეთი და ესპანეთი, ძლიერმა სიცხემ მოიცვა. New York Times მეტეოროლოგიურ სააგენტოებსა და ექსპერტებზე დაყრდნობით წერს, რომ სიცხემ რელიეფი გამოაშრო, რამაც ხანძრები გამოიწვია.

მედიის ცნობით, სამშაბათს, ესპანეთსა და საფრანგეთში საერთაშორისო აეროპორტებიც დაიხურა. ადგილობრივი ხელისუფლების ცნობით, სულ მცირე ხუთი ადამიანი და ხუთი მეხანძრე დაშავდა სამხრეთ საფრანგეთში, სადაც ნარბონის ქალაქთან ახლოს ხანძარი მეორე დღეა მძვინვარებს. ოფიციალური პირების განცხადებით, ხანძარმა უკვე თითქმის 5000 ჰექტარი მიწა გაანადგურა და მის ლიკვიდაციას 1000-ზე მეტი მეხანძრე ცდილობს.

მარსელის ჩრდილოეთით კიდევ ერთი ხანძარი გაჩნდა, რომელიც სწრაფად 1700 ჰექტარზე გავრცელდა. ხანძარმა ახლომდებარე აეროპორტი აიძულა შეეჩერებინა ავიამიმოსვლები, შეაფერხა ადგილობრივი რკინიგზის მუშაობა და საავტომობილო მოძრაობა. ადგილობრივი ხელისუფლების განცხადებით, 700-ზე მეტმა მეხანძრემ მოახერხა ქალაქის ჩრდილოეთ საზღვარზე ხანძრის ჩაქრობა. ამ დროისთვის მცირე მასშტაბის ნგრევა მოხდა, ხოლო მსხვერპლი არ დაფიქსირებულა.

ხანძარს ებრძოდნენ კატალონიაშიც. ესპანეთის ავტონომიური რეგიონის საგანგებო სიტუაციების სამსახურების ცნობით, იქ, ორშაბათიდან, თითქმის 6000 ჰექტარი მიწა დაიწვა.

საერთაშორისო მედია წერს, რომ სამშაბათს, საბერძნეთში, ტემპერატურამ 40 ცელსიუსს, ანუ 104 ფარენჰეიტს გადააჭარბა. სიცხემ ათენის ხელისუფლება აიძულა, შეეზღუდა აკროპოლისის მონახულების საათები, არქეოლოგიური ძეგლი, რომელიც ტურისტებში პოპულარულია და დედაქალაქს გადაჰყურებს. მანამდე, საბერძნეთის შრომის სამინისტრომ ბიზნესს დაავალა, რომ შუადღისას, როცა ტემპერატურა პიკს მიაღწევს, სამუშაო საათები შეეჩერებინათ, წინააღმდეგ შემთხვევაში, მათ 2000 ევრომდე ჯარიმა დაეკისრებოდათ.

ცნობილია, რომ რუმინეთის მეტეოროლოგიურმა სააგენტომ წითელი გაფრთხილება გამოაცხადა, რაც მისი ყველაზე მაღალი დონეა, რადგან სინოპტიკოსები ვარაუდობდნენ, რომ ტემპერატურა შესაძლოა 41 ცელსიუსს, ანუ 105.8 ფარენჰეიტს, მიაღწიოს.

მძიმე ვითარებაა სერბეთშიც, სადაც მეტეოროლოგიურმა სააგენტომ მოსახლეობა "ძალიან საშიში" პირობების შესახებ გააფრთხილა. მათი ცნობით, მოსალოდნელია, რომ ტემპერატურა 38 ცელსიუსს, ანუ 100.4 ფარენჰეიტს, გადააჭარბებს.