18 თებერვალს, საუდის არაბეთში აშშ-ს და რუსეთის ოფიციალური პირებს შორის შეხვედრა იგეგმება. რუსეთის პრეზიდენტის, ვლადიმერ პუტინის პრესმდივანმა დიმიტრი პესკოვმა ეს ინფორმაცია დაადასტურა. მისი თქმით, რუსეთის საგარეო საქმეთა მინისტრი სერგეი ლავროვი და რუსეთის პრეზიდენტის თანაშემწე იური უშაკოვი სამშაბათს ერ-რიადში აშშ-ის წარმომადგენლებს შეხვდებიან.

მისივე თქმით, ლავროვი და უშაკოვი ვლადიმერ პუტინის დავალებით ორშაბათს საუდის არაბეთის დედაქალაქში ჩაფრინდებიან.

"სავარაუდოა, რომ სამშაბათს ერ-რიადში ისინი გამართავენ შეხვედრას ამერიკელ კოლეგებთან, რომელიც, უპირველეს ყოვლისა, დაეთმობა რუსეთ-ამერიკის ურთიერთობების მთელი კომპლექსის აღდგენას", – განაცხადა პესკოვმა.

საუბარი ასევე შეეხება უკრაინაზე მოლაპარაკებების მომზადებას. გარდა ამისა, მხარეები შეთანხმდებიან ვლადიმერ პუტინისა და დონალდ ტრამპის მოახლოებულ შეხვედრაზე, რომლის გამართვაზე ლიდერები 12 თებერვალს სატელეფონო საუბარში შეთანხმდნენ.

აშშ-ს მოლაპარაკებებში წარმოადგენენ სახელმწიფო მდივანი მარკ რუბიო, ეროვნული უსაფრთხოების მრჩეველი მაიკ უოლცი და პრეზიდენტის სპეციალური წარმომადგენელი ახლო აღმოსავლეთში სტივ ვიტკოფი.

უკრაინა ელ რიადში დაგეგმილ მოლაპარაკებებში არ მონაწილეობს. მარკო რუბიოს თქმით, ეს არის წინასწარი მოლაპარაკებები, ხოლო როცა უკრაინის სამშვიდობო შეთანხმებაზე რეალური მოლაპარაკებები დაიწყება, მასში ჩართული უნდა იყვნენ კიევი და ევროპა.