"ქართულ ოცნებას არც ერთი პრობლემის მოგვარების ხედვა და რესურსი აღარ გააჩნია. ვერც პროტესტს ერევა. ამიტომ დროს იხანგრძლივებს ნარკომანიასთან ვითომ ბრძოლით", — ამის შესახებ სოციალურ ქსელში პარტია ფედერალისტების ლიდერი თამარ ჩერგოლეიშვილი წერს და ოპოზიციური პარტიის წარმომადგენლებისა და აქტივისტებისთვის ნარკოლოგიური შემოწმების მოთხოვნებს ეხმაურება.

მისი თქმით, "ამ სასოწარკვეთილი მანევრის სამიზნე პოლიტიკური ოპოზიციაა, მაგრამ ბადეში გაცილებით მეტი არაანგაჟირებული მოქალაქე მოჰყვება".

"სისტემური უმუშევრობის, სიღარიბის და ახალგაზრდების დისფუნქციურობის ფონზე, ბუნებრივად ვარდება ნარკომანია პრობლემად.

ქართულ ოცნებას არცერთი პრობლემის მოგვარების ხედვა და რესურსი აღარ გააჩნია.

ვერც პროტესტს ერევა.

ამიტომ დროს იხანგრძლივებს ნარკომანიასთან ვითომ ბრძოლით, სინამდვილეში პოლიტიკური წნეხის იარაღად უნდა, რომ პროტესტის დისკრედიტაცია შეძლოს და ძალაუფლება ოპონენტების დისკრედიტაციით შეინარჩუნოს (ეგენი გეები და ნარკომანები არიან).

ცხადია, ამ სასოწარკვეთილი მანევრის სამიზნე პოლიტიკური ოპოზიციაა (და ასევე შიდა კლანები — იხილეთ რიჟვაძის წერილი), მაგრამ ბადეში გაცილებით მეტი არაანგაჟირებული მოქალაქე მოჰყვება.

რეალურად, ვინც პრობლემად ნარკომანიას ასახელებს, იმას ოჯახში აქვს პრობლემა - უმუშევარ შვილს/შვილიშვილს/ძმიშვილს/დიშვილს ხედავს, რომელიც სამსახურში სიარულის და თავის რეალიზების ნაცვლად, გამოსავალს დრაგებში ეძებს.

ამ ხალხს შვილების დაჭერა კი არა, დასაქმება და ღირსეული ცხოვრება უნდა", — წერს პარტია "ფედერალისტების" ერთ-ერთი ლიდერი, თამარ ჩერგოლეიშვილი სოციალურ ქსელში.

ცნობისათვის, რამდენიმე აქტივისტი და კოალიცია ლელო — ძლიერი საქართველოს სამი წევრი — ოთარ ფარულავა, ლევან ჯორბენაძე და ბექა ბერიძიშვილ პოლიციამ ნარკო-შემოწმებაზე გუშინ, 8 ივლისის ღამეს გადაიყვანა.