რა უნდა ჩაიცვან კაცებმა? — პარიზის კაცების მოდის კვირეულის მიმოხილვა

ევროპაში მძვინვარე სიცხეების ფონზე, რომლებმაც პარიზიც კი არ დაინდო, საფრანგეთის დედაქალაქში კვირას დასრულდა კაცის მოდის კვირეული.

დაუნდობელი სიცხე, თითქოს ალეგორიად იქცა იმ ზეწოლისა, რომელსაც მაღალი მოდის ინდუსტრია ამჟამად განიცდის — მთავარი მოდის სახლებიდან თითქმის ყველამ შეიცვალა შემოქმედებითი ხელმძღვანელი, მოდის კონგლომერატების აქციების ფასები ვარდება, მომავალი გაურკვეველია... ამდენად, 2026 წლის გაზაფხული-ზაფხულის კოლექციები თავშეკავებულობითა და ზომიერებით გამოირჩეოდნენ. ცვლილებებით აღსავსე კლიმატში დიზაინერებმა მრავალფუნქციური, ადაპტირებადი გარდერობი შემოგვთავაზეს, რომელიც გლობალურ მომხმარებელს მოერგებოდა. ტანსაცმლის აქცენტმა სლოგანებიდან და დრამატულობიდან ერთტონიან ფერებზე, ფუნქციურობასა და პრაქტიკულობაზე გადაინაცვლა.

პარიზის კაცთა მოდის კვირეულზე საინტერესო დებიუტები და ნამდვილი ვარსკვლავთცვენა ვიხილეთ. წარმოგიდგენთ კვირეულის შეჯამებას, მთავარ ნარატივებს და საუკეთესო ლუქებს:

მოშიშვლებული ელეგანტურობა

**ჯონათან ანდერსონის სადებიუტო კოლექცია Dior-ში**

ფოტო: Dior

კვირის ყველაზე აღმაფრთოვანებელი მოლოდინით სავსე მომენტი Hôtel des Invalides-ში შედგა, სადაც ლეგენდარულმა მოდის სახლმა, Dior-მა თავისი ახალი კრეატიული ხელმძღვანელის — ლონდონური ბრენდის, J.W. Anderson-ის დამფუძნებლის, ჯონათან ანდერსონის პირველი კოლექცია წარადგინა.

ანდერსონი ცოტა ხნის წინ დაემშვიდობა Loewe-ს, სადაც 11 წლის განმავლობაში მუშაობდა და ბრენდს ახალი სიცოცხლე შთაბერა. მის სადებიუტო შოუს წინა რიგებში უყურებდნენ რიანა, საბრინა კარპენტერი, დონატელა ვერსაჩე და რობერტ პატინსონი. პოდიუმის დიზაინი ბერლინის Gemäldegalerie-ს ინტერიერის იმიტაცია იყო და XVIII საუკუნის ხელოვნებას ეძღვნებოდა. ანდერსონმა Dior-ში მსუბუქი, ყოველდღიური ელეგანტურობა შემოიტანა. მისი კოლექცია Dior-ის არქივიდან კლასიკური სილუეტების ახლებური ინტერპრეტაციით იყო სავსე.

დახვეწილი სილამაზე მზის ჩასვლის ფონზე

**ფარელის კოლექცია Louis Vuitton-ისთვის**

ფოტო: Louis Vuitton

პარიზის ცენტრში, პომპიდუს ცენტრის წინ, ფარელ უილიამსმა Louis Vuitton-ის შთამბეჭდავი შოუ გამართა, რომელსაც ბიონსე და ჯეი-ზიც ესწრებოდნენ. მიუხედავად ბრწყინვალე სცენისა, კოლექცია საკმაოდ თავშეკავებული აღმოჩნდა და ძირითადად ინდური ტანსაცმლის გავლენები შეიმჩნეოდა. კოლექციაში ვიხილეთ მუქი იისფერი ლაბადები და მდოგვისფერი ნაკეციანი შორტები, მოგვიანებით კი ლაშქრობის სტილი: ქარისგან მცველი პიჯაკები, კლდეზე ასასვლელი ფეხსაცმელი და თვლებით მორთული წინდები. კოლექციის ვიზუალური სტილი უეს ანდერსონის ფილმს მოგაგონებდათ, რაც განზრახულიც იყო: ჟაკეტებზე მოტივები რეჟისორის 2007 წლის ფილმში The Darjeeling Limited გამოყენებული Louis Vuitton-ის ჩემოდნებს ეძღვნებოდა.

ფერები და გზავნილები

**ვილი ჩავარიას კოლექცია**

ფოტო: Swan Gallet/WWD/Getty Images

ბევრ ჩვენებაზე ბრჭყვიალა ფერები მოედო პოდიუმს, ზოგჯერ გაბედული პოლიტიკური გზავნილებით, ზოგჯერ კი ტრადიციის კოხტა გადახედვით.

ამერიკელმა დიზაინერმა უილი ჩავარიამ თავისი მეორე პარიზული შოუ ამერიკის სამოქალაქო თავისუფლებების კავშირის (ACLU) დახმარებით გახსნა — კოლექცია პირდაპირ ეხმაურებოდა ვენესუელელი მიგრანტების სადავო დეპორტაციას. პოდიუმზე 35 მამაკაცი, თეთრი მაისურებით, მუხლმოდრეკილი იდგა — სცენა, რომელიც სალვადორის მეგასაპატიმროს კადრებს მოგაგონებდათ. დიზაინერის თქმით, ეს იყო განცხადება "მიზნობრივი პროფილირებისა და დევნის წინააღმდეგ, ყოველგვარი სამართლებრივი პროცედურის გარეშე".

მოგვიანებით, ჩავარიამ ლათინოამერიკული სტილისტური კოდები ძველ ჰოლივუდურ ესთეტიკას შეუხამა — რბილი ვარდისფერი და ლავანდისფერი ატლასის პალტოები, პიჯაკები და შარლ ჟურდანთან თანამშრომლობით შექმნილი ფეხსაცმელები.

პროვანსიდან ვერსალში

**ჟაკმუსის კოლექცია**

ფოტო: Geoffroy Van Der Hasselt/Barbara Laborde/AFP/Getty Images

მამაკაცის მოდის კვირეულის გრანდიოზული დახურვა Jacquemus-ის დამფუძნებელმა, სიმონ პორტ ჟაკმუსმა მოაწყო ვერსალში. დიზაინერმა, რომელიც ცნობილია თავისი პროვანსული წარსულის რომანტიზირებით, ამჯერად სოფლის ბავშვობა მეფის სასახლის ორანჟერეის ინტერიერში გადაიტანა.

კოლექცია რძისფერ ფერებში იყო წარმოდგენილი: თეთრი, ნაზი ვარდისფერი და ნაჭუჭისფერი კოსტიუმები — ბაფთებით, კორსეტებითა და წინსაფრის სტილის დეტალებით. როგორც თავად ჟაკმუსმა აღნიშნა, შოუ მეხსიერებასა და მითს აერთიანებდა: მარსელ პანიოლის ფილმებიდან დაწყებული, მისი დიდი ბებიითა და ინგლისელი ტურისტებით დასრულებული.

ჟაკმუსმა კოლექციისთვის ტერმინი “endimanché” გამოიყენა, რაც კვირა დღეს სადღესასწაულოდ გამოწყობას ნიშნავს. ეს მისთვის წმინდა სისუფთავის განცდას ნიშნავს: "თითქოს მედდა იყო, ჩემი ბებია სულ თეთრს იცვამდა და სამკაულებს ატარებდა…ძალიან სუფთა იყო". დიზაინერის თქმით, პროვანსი მისთვის რჩება "ოცნებად… ძალიან მნიშვნელოვან კლიშედ."

ახალი კოლექციების სანახავად პარიზში უამრავმა ცნობილმა სახემ მოიყარა თავი. აი, რამდენიმე მათგანი: