აშშ-ში მომავალი და მოქმედი სატვირთო ავტომობილის მძღოლებისთვის ინგლისური ენის ცოდნის გაუმჯობესება აუცილებელი მას შემდეგ გახდა, რაც პრეზიდენტმა ტრამპმა აღმასრულებელი ბრძანება გამოსცა, რომლის მიხედვითაც მძღოლები, რომლებიც სათანადოდ ვერ კითხულობენ და ვერ საუბრობენ ინგლისურად, ამ სამსახურისთვის შეუსაბამოდ ჩაითვლებიან.

"მძღოლი, რომელიც ვერ იგებს ინგლისურს, ვერ მართავს კომერციულ სატვირთოს ამ ქვეყანაში. წერტილი", — თქვა ტრანსპორტის მდივანმა შონ დაფიმ გასულ თვეში, როდესაც გამოაცხადა მოთხოვნების აღსრულების ახალი სახელმძღვანელო, რომელიც ძალაში ოთხშაბათს შევა.

აშშ-ის სატრანსპორტო დეპარტამენტის განახლებული პროცედურები ითვალისწინებს გაძლიერებულ შემოწმებებს, რათა დადგინდეს, შეუძლიათ თუ არა მძღოლებს პასუხის გაცემა კითხვებზე, მითითებების ინგლისურად გაგება და საგზაო ნიშნების და ელექტრონული საინფორმაციო დაფების წაკითხვა.

NBCNEWS წერს, რომ ის მძღოლები, ვინც ინგლისური მეორე ენად ისწავლა, შეშფოთებულნი არიან, რომ შეიძლება სამუშაო დაკარგონ, თუკი შეცდომას დაუშვებენ ან ძლიერ აქცენტით ისაუბრებენ კითხვებზე პასუხისას. ბევრმა მათგანმა ინგლისურის გაუმჯობესების მიზნით ინგლისური ენის კურსებზე სიარული, ტექსტების დაზეპირება და საგანმანათლებლო ვიდეოების ყურება დაიწყო .

ახალი კანონი ვრცელდება სატვირთო ავტომობილის და ავტობუსის მძღოლებზე, რომლებიც ახორციელებენ საქონლის ან მგზავრების გადაყვანას სხვადასხვა შტატებში. მისი მიზანია საგზაო უსაფრთხოების გაუმჯობესება, რადგან მძღოლების ინგლისურის არცოდნამ შესაძლოა, ავტოსატრანსპორტო შემთხვევებს შეუწყო ხელი.

NBCNEWS წერს, რომ სატვირთო მძღოლებისთვის ინგლისურის კითხვა და საუბარი ახალი მოთხოვნა არ არის, თუმცა მისი დარღვევისთვის ჯარიმა ახლა უფრო მკაცრი ხდება.

კომერციული მძღოლის ლიცენზიის მისაღებად კანდიდატებმა უნდა ჩააბარონ წერილობითი ტესტი და შეძლონ ავტობუსის ან სატვირთოს სხვადასხვა ნაწილის დასახელება ინგლისურად.

განახლებული პოლიტიკა ცვლის 9 წლის წინანდელ სახელმძღვანელოს, რომელიც ძალაში იყო პრეზიდენტ ბარაკ ობამას ვადის ბოლოს. 2016 წელს ფედერალურმა ავტოსატრანსპორტო უსაფრთხოების ადმინისტრაციამ განაცხადა, რომ მძღოლებს, ვისაც ინგლისური არ ჰქონდათ სათანადოდ ათვისებული, შეეძლოთ ჯარიმის მიღება, მაგრამ მათ მუშაობის აკრძალვა არ ემუქრებოდათ. მანამდე კი მათ "მომსახურებიდან მოხსნის სტატუსი" ენიჭებოდათ.