ქართული იუთუბის მაფია გიორგი მგალობლიშვილის, იგივე GI2GI-ს იუთუბ პროექტია, რომელიც უკვე მეხუთე წელია მიმდინარეობს. მაფია თამაშია, რომელშიც "პატიოსანი მოქალაქეები და მაფიოზები" ერთმანეთს უპირისპირდებიან და გამარჯვებისთვის იბრძვიან. 2020 წლის 28 ნოემბრიდან დღემდე პროექტმა დიდი გზა გაიარა — პანდემიის პერიოდში დაწყებული მაფია პირველი ორი სეზონის განმავლობაში ონლაინ ტარდებოდა — იუთუბერები საკუთარი სახლებიდან, ვიდეოზარის საშუალებით თამაშობდნენ და ჩანაწერს იუთუბზე აქვეყნებდნენ, თუმცა 2023 წლის 27 მაისს თამაშმა ეკრანებიდან ცოცხალ სივრცეში გადაინაცვლა.

ახალ ფორმატში პროექტი ბევრად უფრო განვითარდა, დააინტერესა არა მხოლოდ მაყურებელი, არამედ მრავალი სპონსორიც. ლაივ სეზონებში დაიწყო საპრიზო თანხის — 20 000 ლარის გათამაშება. 5 სეზონის განმავლობაში პროექტში უამრავმა ადამიანმა მიიღო მონაწილეობა — იუთუბერებმა, ინფლუენსერებმა, მსახიობებმა, ფეხბურთელებმა. მათ შორის, რამდენიმე კვირის წინ ჩატარდა სპეციალური, სეზონსგარე თამაში ქართველი ფეხბურთელების — გიორგი მამარდაშვილის, ლაშა დვალის, გიორგი ქვილითაიასა და ანზორ მექვაბიშვილის მონაწილეობით.

ამ 2 ონლაინ და 5 ლაივ სეზონის განმავლობაში ქართული იუთუბის მაფიამ შეძლო თავი შეეყვარებინა უამრავი მაყურებლისთვის, რომლებთანაც პროექტს განსაკუთრებით ძლიერი კავშირი აქვს — იქნება ეს მაფიის ფეისბუქ ჯგუფი თუ იუთუბ კომენტარები, მაყურებელი მუდმივად აქტიურადაა ჩართული, აფასებენ თამაშებს, მადლობას უხდიან, აქებენ თუ აკრიტიკებენ მოთამაშეებს. ამას გარდა, მათ პროექტში მონაწილეობის შესაძლებლობაც ეძლევათ — ქართული იუთუბის მაფიის მე-4 სეზონში სტუდენტების ეპიზოდიც ვიხილეთ.

მაყურებელთან ურთიერთობა ახალ ეტაპზე გადავიდა, როცა მაფიამ საკუთარი სივრცე გახსნა — PoolRoom Mafia დიდ დიღომში, მირიან მეფის 31-ში მდებარეობს. მულტიფუნქციურ სივრცეში შესაძლებელია ბილიარდის, ფლეისთეიშენის, სიმრეისინგის და, რაც მთავარია, მაფიის თამაში, როგორც თქვენს მეგობრებთან, ისე საყვარელ იუთუბერებთან ერთად, რომლებიც ზოგჯერ თამაშის წამყვანები, ზოგჯერ კი მონაწილეები არიან. ამ ადგილას ხშირად მოთამაშეები და მაყურებლები სხვადასხვა მოვლენების, მათ შორის ფეხბურთის თამაშებისა და მაფიის ახალი ეპიზოდების საყურებლად იკრიბებიან.

გასულ კვირას, 6 ივლისს, ქართული იუთუბის მაფიის მე-5 სეზონის ფინალი გაიმართა. აღსანიშნავია, რომ ეს სეზონი დანარჩენებისგან გამორჩეული იყო, რადგან თამაშში იაპონური კლანის ახალი როლები — შოგუნი და იაკუძა დაემატა, რომლებიც იტალიური მაფიის კლანს დაუპირისპირდნენ.

სეზონის მიმდინარეობისას რამდენჯერმე გაჟღერდა იდეა იმის შესახებ, რომ ფინალი სიცილიაზე უნდა გადაღებულიყო. თავიდან, როგორც მაყურებელი, ისე თავად მოთამაშეები ამ იდეას სერიოზულად არ აღიქვამდნენ, რადგან ვერც წარმოიდგენდნენ, რომ ეს იდეა მართლაც შესაძლოა განხორციელებულიყო. ამის მიუხედავად, პროექტის ორგანიზატორებმა მოახერხეს, რომ ქართული იუთუბის მაფიის მე-5 სეზონის ყველა ფინალისტი სიცილიაში წაეყვანათ და ფინალური ეპიზოდი კასტელო დელი სკიავის ტერიტორიაზე, იმ სასახლიდან გადაეღოთ, რომელშიც ფილმ ნათლიას (Godfather) ლეგენდარული სცენებია გადაღებული.

ფინალურ ეპიზოდში მონაწილეობდნენ:

• გიორგი კალატოზი
• საბა საპანაძე
• ვახო ბოლოთაშვილი
• გურამ გაბუნია
• ნოდარ შაქარაშვილი
• თორნიკე კოპალეიშვილი
• ანანო თოთიაური
• ლაშა გელაშვილი
• გიორგი ქორიძე
• გიორგი მახარაშვილი
• ბასტო გოგუა
• ნინიკო მამარდაშვილი

გამარჯვებული კი, მიუხედავად იტალიაში ყოფნისა, იაპონური კლანი გახდა: შოგუნის როლს თორნიკე კოპალეიშვილი ასრულებდა, რომელიც თამაშის ბოლო 3 მონაწილეს შორის დარჩა და ხმის მიცემის შედეგად გაიმარჯვა, იაკუძა კი გიორგი მახარაშვილი იყო. გამარჯვებულებს 10 000 ლარი შეხვდათ, თუმცა უსაჩუქროდ არც სხვა მოთამაშეები დარჩენილან — მაფიის სპონსორებმა თავისი რჩეული მოთამაშეები დააჯილდოვეს.

იაპონური სეზონი და სიცილიური ფინალი წარმატებით შედგა. ქართული იუთუბის მაფიის წარმატება კი — ქართული იუთუბისა და ინტერნეტსივრცის განვითარებაა. საინტერესოა, რას უნდა ველოდოთ მომავალ სეზონში, განსაკუთრებით კი იმიტომ, რომ მოთამაშეების მხრიდან საკმაოდ ამაღელვებელი იდეა — შემდეგი ფინალის იაპონიაში გადაღებაც გაჟღერდა.

ფინალური ეპიზოდი იხილეთ აქ: