სააგენტო France 24-ს ცნობით, დღეს, 17 თებერვალს, პარიზში ევროპელი ლიდერების საგანგებო სამიტი მიმდინარეობს. ევროპელი ლიდერები ორშაბათს ელისეს სასახლეში პარიზის საგანგებო სამიტზე ჩავიდნენ. მთავარი განსახილველი თემები ევროპის უსაფრთხოების საკითხები და უკრაინის ომთან დაკავშირებით აშშ-ს ახალი პრეზიდენტის, დონალდ ტრამპის სტრატეგიაა.

ემანუელ მაკრონის გარდა, შეხვედრაში მონაწილეობას შემდეგი ლიდერები იღებენ: დიდი ბრიტანეთის პრემიერმინისტრი კირ სტარმერი, გერმანიის კანცლერი ოლაფ შოლცი, იტალიის პრემიერმინისტრი ჯორჯია მელონი, ესპანეთის პრემიერმინისტრი პედრო სანჩესი, ნიდერლანდების პრემიერმინისტრი დიკ სხოფი, დანიის პრემიერმინისტრი მეტე ფრედერიქსენი, NATO-ს გენერალური მდივანი მარკ რუტე, ევროკომისიის პრეზიდენტი ურსულა ფონ დერ ლაიენი და ევროპული საბჭოს პრეზიდენტი ანტონიო კოსტა.

საფრანგეთის პრეზიდენტის ადმინისტრაციის ცნობით, ემანუელ მაკრონმა სამიტის დაწყების წინ აშშ-ის პრეზიდენტთან, დონალდ ტრამპთან სატელეფონო საუბარი გამართა.

ცნობისთვის, ტრამპის უკრაინაში სპეციალურმა წარმომადგენელმა, კიტ კელოგმა, განაცხადა, რომ ევროპა უკრაინის შესახებ მოლაპარაკებებში უშუალოდ არ ჩაერთვება, მაგრამ პროცესებში რაღაც როლი მაინც ექნება.