აშშ-ის ვიცე-პრეზიდენტმა, ჯეი დი ვენსმა მისი ხელმძღვანელობით ამერიკული დელეგაციის უკრაინულ დელეგაციასთან შეხვედრის შემდეგ განაცხადა, რომ აშშ-ის მიზანი ხანგრძლივი მშვიდობის მიღწევაა, რაც ევროპას რამდენიმე წელიწადში კონფლიქტის განახლებას თავიდან აარიდებს.

"რა თქმა უნდა, მოხარულები ვართ მივიღოთ უკრაინული დელეგაცია, რომელსაც პრეზიდენტი ზელენსკი ხელმძღვანელობს. ნაყოფიერი საუბარი გვქონდა — განვიხილეთ რამდენიმე რამ, რასაც უნდა გავყვეთ და ვიმუშაოთ.

ფუნდამენტური მიზანია, როგორც პრეზიდენტმა ტრამპმა დასახა — ჩვენ გვინდა ამ ომის დასრულება, გვინდა, რომ ადამიანების ხოცვა შეჩერდეს, მაგრამ გვინდა გამძლე, ხანგრძლივი მშვიდობის მიღწევა და არა ისეთის, რომელიც სულ რამდენიმე წელიწადში აღმოსავლეთ ევროპას კონფლიქტში გაჰხვევს. ასე რომ, კარგი საუბარი გვქონდა იმაზე, თუ როგორ შეგვიძლია ამის ერთად მიღწევა და ნამდვილად მეტს ვისაუბრებთ მომავალ დღეებში, კვირებში და თვეებში", — განაცხადა აშშ-ის ვიცე-პრეზიდენტმა უკრაინულ დელეგაციასთან შეხვედრის შემდეგ.

კომენტარი გააკეთა უკრაინის პრეზიდენტმა ვოლოდიმირ ზელენსკიმაც — მისი თქმით, მშვიდობა უკრაინის ინტერესშიცაა, თუმცა ქვეყანას უსაფრთხოების რეალური გარანტიები სჭირდება.

"ვფიქრობ, ვიცე-პრეზიდენტმა ყველაფერი აბსოლუტურად სწორად თქვა. მინდა მადლობა ვუთხრა მხარდაჭერისთვის პრეზიდენტ ტრამპს. კარგი საუბარი გვქონდა, ჩვენი პირველი შეხვედრა იყო და დარწმუნებული ვარ, არა უკანასკნელი. რეალურად, ჩვენ გვჭირდება მეტი საუბარი, მეტი მუშაობა და გეგმის მომზადება, თუ როგორ შევაჩეროთ პუტინი და დავასრულოთ ომი. ნამდვილად ძალიან გვინდა მშვიდობა, მაგრამ გვჭირდება უსაფრთხოების რეალური გარანტიები, შესაბამისად, გავაგრძელებთ ჩვენს შეხვედრებს და შრომას”, — განაცხადა ვოლოდიმირ ზელენსკიმ.