დიდი ხანია გვესმის, რომ საქართველო ჩემპიონია რეფორმების გატარების კუთხით. საინტერესოა, რა ეკონომიკურ რეფორმებს ატარებს საქართველო ამჟამად და როგორია მათი მიმდინარეობა. ამ კითხვაზე პასუხს ახალი ონლაინპლატფორმა რეფორმეტრი გაგვცემს, რომელზეც, ამ მომენტისთვის, ჯამში სამი რეფორმის შეფასება განხორციელდა.

რეფორმეტრი (ReforMeter.iset-pi.ge) ISET-ის კვლევითი ინსტიტუტის ახალი პროდუქტია, რომელიც დაინტერესებულ პირებს საქართველოში მიმდინარე ეკონომიკურ რეფორმებზე აწვდის ინფორმაციას. პლატფორმაზე მომხმარებელი იპოვის როგორც რეფორმების მიმდინარეობის შეფასებას, ისე იმ ეკონომიკურ მაჩვენებლებს, რომელზეც შერჩეული რეფორმა ახდენს გავლენას. რეფორმებს აფასებენ შემფასებელთა ჯგუფები, რომლებიც დაკომპლექტებულია პირებით, რომლებზეც პირდაპირ ან ირიბ გავლენას ახდენს კონკრეტული რეფორმა.

4,68 (10 ქულიდან) - ასეთია ამ დროისთვის რეფორმვერდიქტი - მთავრობის ერთიანი შეფასება. უახლოეს მომავალში რეფორმეტრის სიას საპენსიო რეფორმა და პროფესიული განათლების რეფორმაც დაემატება.

10-ქულიან შკალაზე, ყველაზე მაღალი, 5,41 ქულა სოფლის მეურნეობის განვითარების რეფორმამ მიიღო. რეფორმის ფარგლებში დაინერგა დარგის ფინანსური სტიმულირების სხვადასხვა პროგრამა, რის შედეგადაც მზარდი დინამიკით ხასიათდება კომერციული ბანკების მიერ გაცემული სესხების მაჩვენებელი. რეგიონებში შეიქმნა საინფორმაციო საკონსულტაციო სამსახურები. ევროკავშირის კანონმდებლობასთან დაახლოების მიზნით ხორციელდება რიგი საკანონმდებლო ცვლილებები. ასევე, პროცესშია სასოფლო მეურნეობათა რეესტრის, მიწათსარგებლობის გეოინფორმაციული სისტემისა და ვენახების ეროვნული კადასტრის შექმნა.

საშუალო შეფასება - 4,78 მიიღო მცირე და საშუალო ბიზნესის/ინოვაციების განვითარების რეფორმამ. რეფორმის ფარგლებში დაინერგა ისეთი ინსტრუმენტები, როგორიცაა Start-Up საქართველო და აწარმოე საქართველოში. მცირე და საშუალო კომპანიებისთვის ხელმისაწვდომია ტრენინგები ზოგად სამეწარმეო უნარ-ჩვევების, ფინანსური მენეჯმენტისა და ინოვაციური ბიზნესის შესახებ. ხორციელდება ექსპორტის პოტენციალის მქონე კომპანიების მხარდაჭერა პარტნიორების მოძიების მიზნით. ჯერ არ დასრულებულა საექსპორტო პოტენციალის მქონე პროდუქტების იდენტიფიცირება და არ დანერგილა ინოვაციებთან დაკავშირებული ინდიკატორების რეგულარული დაკვირვება. ასევე, იგეგმება კვლევაზე და განვითარებაზე საგადასახადო შეღავათების დაწესება.

ყველაზე დაბალი შეფასება, ამ ეტაპისთვის, კაპიტალის ბაზრის რეფორმას ერგო - 3,85. ეროვნულ ბანკთან ერთად რეფორმას ეკონომიკისა და ფინანსთა სამინისტროები 2016 წლიდან ახორციელებენ. ამ ეტაპისთვის, განხორციელდა ცვლილებები ვალის კანონში, რათა ფასიანი ქაღალდების გამოშვება ბაზრის განვითარების მიზნისთვის იყოს შესაძლებელი. მომზადდა ინფლაციით ინდექსირებული ბონდების ემისიის საკითხი და დასრულდა ბენჩმარკ-ბონდების საკითხის შესწავლა. უკვე შესაძლებელია ეროვნული ბანკის მიერ ფასიანი ქაღალდების გირაოში მიღება. შემუშავების პროცესშია სახელმწიფო ვალის მართვის სტრატეგია. ბონდები ეროვნული ბანკის ანგარიშსწორების სისტემაში ჯერ არ დამატებულა. იგეგმება ადგილობრივი სარეიტინგო სააგენტოს შექმნა და ადგილობრივი სარეიტინგო შკალის შემუშავება. ფინალურ ეტაპზეა საინვესტიციო ფონდების შესახებ საკანონმდებლო პროექტი.