ამერიკელი კონგრესმენი ჯო უილსონი X-ზე იმ ქართველი მოსამართლეებისა და პროკურორების სიას აქვეყნებს, რომელთა დასანქცირებასაც ითხოვს.

"ივანიშვილის რეჟიმის ყველა ტყვე და პოლიტიკური პატიმარი უნდა გათავისუფლდეს! ყველა მოსამართლესა და პროკურორს, რომელიც ამ სასტიკ რეპრესიაში ჩართულია, სანქციები უნდა დაუწესდეს!", — წერს ჯო უილსონი.

პოსტის თანდართულ დოკუმენტში სამი სიაა წარმოდგენილი. პირველი სია — "ქართული ოცნების ტყვეები" მოიცავს 52 ადამიანს, რომლებიც პოლიტიკური ნიშნით იდევნებიან — სიაში არიან მსახიობი ანდრო ჭიჭინაძე და ბათუმელებისა და ნეტგაზეთის დამფუძნებელი მზია ამაღლობელი.

დანარჩენი ორი სია მოიცავს მოსამართლეებსა და პროკურორებს, რომლების დასანქცირებასაც ამერიკელი პოლიტიკოსი ითხოვს — სიები 19 მოსამართლისა და 18 პროკურორისგან შედგება.