ადამიანის უფლებათა ცენტრი (EMC) არ იზიარებს ე.წ. ციანიდის საქმეზე თბილისის საქალაქო სასამართლოს მიერ გამოტანილ განაჩენს, რომლის მიხედვითაც დეკანოზ გიორგი მამალაძეს ცხრა წლით თავისუფლების აღკვეთა მიესაჯა.

ცენტრის განცხადებით, სასამართლო პროცესის დახურულ რეჟიმში წარმართვის აუცილებლობა არ იყო და ის მოუწოდებდა სასამართლოს პროცესი გაეხსნა:

"პროცესის დახურვით სასამართლომ ხელი შეუწყო მართლმსაჯულების გამჭვირვალობის ხარისხისა და სასამართლოსადმი საზოგადოების ნდობის შემცირებას. მით უფრო, როცა საქმე ეხება რეზონანსულ საქმეს, რომლის მიმართაც საზოგადოების ინტერესი თავიდანვე დიდი იყო."

ორგანიზაციის თქმით, საქმის მთავარი მოწმე ირაკლი მამალაძე დეკანოზ გიორგი მამალაძის "საუბრის პროვოცირებას" ცდილობდა და სასამართლომ ვერ მოისმინა როგორ გეგმავდა ბრალდებული საპატრიარქოს მდივან-რეფერანტის, შორენა თეთრუაშვილის მკვლელობას:

"სასამართლომ ვერ მოისმინა, თუ სად, ვისგან, როგორ შეიძინა ციანიდი დეკანოზმა იმ პირობებში, როცა საგამოძიებო ორგანოები უწყვეტ რეჟიმში ახორციელებდნენ მის ფარულ მიყურადებას."

ადამიანის უფლებათა ცენტრის განცხადებით, სასამართლომ "ვერ მოისმინა არგუმენტირებული პასუხი", თუ რატომ არ არსებობს დეკანოზის ბარგის ჩხრეკის ვიდეომასალა.

მათი თქმით, სასამართლომ ბრალდების მხარისგან ანგარების მოტივი არ გაიზიარა, რამაც გამამართლებელი განაჩენის წინაპირობა შექმნა:

"ანგარების მოტივის გამორიცხვით ფაქტობრივად გამამართლებელი განაჩენის წინაპირობა შეიქმნა, სასამართლომ პროკურატურის ბრალდება გადააკვალიფიცირა და მკვლელობის მომზადების მოტივად საქმის მასალებით სრულიად დაუდასტურებელი შურისძიება მიუთითა."

ადამიანის უფლებათა ცენტრი მიიჩნევს, რომ ე.წ. ციანიდის საქმეზე დაირღვა თანასწორობისა და შეჯიბრებითობის პრინციპი და ხელისუფლების მაღალი თანამდებობის პირებმა გიორგი მამალაძის მიმართ უხეშად დაარღვიეს უდანაშაულობის პრეზუმფცია.

დღეს, 5 აგვისტოს თბილისის საქალაქო სასამართლომ დეკანოზი გიორგი მამალაძე შორენა თეთრუაშვილის განზრახ მკვლელობასა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

დეტალური განაჩენის ჩაბარების შემდეგ პროკურატურა მოტივის ნაწილში განაჩენის განაწილებას აპირებს.