"ამ სისტემაში, ასეთ სასამართლოში ეს დიდი გამარჯვებაა. ეს კი ვერ მოხდებოდა თუ ჩვენ არ ვიდგებოდით ქუჩაში. ჩვენი შეუპოვრობის შედეგია სანქციებიც", — ამის შესახებ საქართველოს უნივერსიტეტის ხარისხის სამსახურის უფროსი არჩილ ჯანგირაშვილი 19 წლის სანდრო ბუკიას სასამართლო პროცესზე წერს. მისივე თქმით, ეს არის "ახალგაზრდა, რომელიც დედას ხელიდან გასტაცეს, სცემეს და ბრალად წაუყენეს გინება და პოლიციელისთვის წინააღმდეგობის გაწევა".

სანდრო ბუკია 7 დეკემბერს საპროტესტო აქციაზე დააკავეს, შემდეგ კი ხელწერილით გაათავისუფლეს. როგორც სანდროს დედა აცხადებდა, მის შვილს ეპილეფსია აქვს. დღეს, 27 დეკემბერს კი სანდრო ბუკიას სასამართლო პროცესი შედგა. მოსამართლემ გინების ნაწილში ის არ ცნო სამართალდამრღვევად, ხოლო პოლიციელის დაუმორჩილებლობის ნაწილში — გაფრთხილება მისცა.

"დღეს სანდროს [ბუკიას] სასამართლო პროცესი გაიმართა – ახალგაზრდის, რომელიც დედას ხელიდან გასტაცეს, სცემეს და ბრალად წაუყენეს გინება და პოლიციელისთვის წინააღმდეგობის გაწევა. პროცესზე კვლავ დავინახეთ უნიჭო თეატრალიზებული დადგმა, მაგრამ აშკარად შეინიშნებოდა სანქციების შიში, რადგან სანქცირებული მოსამართლის ნინო ენუქიძის ქცევა შედარებით შეცვლილი იყო. ის უფრო შეშინებულს ჰგავდა.

სახელმწიფოს მოწმეებმა ვერ შეძლეს გინების ფაქტის დამტკიცება – მოწმეები ერთმანეთისგან სრულიად აცდენილ ჩვენებებს აძლევდნენ. ვიმეორებ მორიგი უნიჭო სპექტაკლი იყო. რა თქმა უნდა სანდროს უმაგრესმა ადვოკატმა: თამუნა გაბოძემ ათრია მოწმეები, სახელმწიფოს წარმომადგენელი იურისტიც მოსპო და მოსამართლეც კარგად ამეცადინა.

საბოლოოდ შედეგი ასეთია: გინების ნაწილში არ ცნეს სამართალდამრღვევად, ხოლო პოლიციელის დაუმორჩილებლობის ნაწილში გაფრთხილება.

ამ სისტემაში, ასეთ სასამართლოში ეს დიდი გამარჯვებაა. ეს კი ვერ მოხდებოდა თუ ჩვენ არ ვიდგებოდით ქუჩაში. ჩვენი შეუპოვრობის შედეგია სანქციებიც. ანუ ჩვენს ქუჩაში დგომას მოაქვს სარგებელი ადამიანებისთვის და ჯამში რეჟიმს უთხრის ძირს. არ უნდა გავჩერდეთ. ბრძოლა გრძელდება, და რეჟიმს მალე ჩამოვშლით. მათ დიდი მომავალი არ აქვთ!

ბოლოს კი ორმა "სამართალდამრღვევმა" ფოტოც გადავიღეთ ერთად", — წერს სოციალურ ქსელში არჩილ ჯანგირაშვილი, რომელიც 7 დეკემბერს საპროტესტო აქციაზე დააკავეს და 9 დეკემბერს გაათავისუფლეს.