პარტია "გახარია საქართველოსთვის" წევრმა, დიმიტრი ცქიტიშვილმა, პალიტრანიუსის გადაცემაში განაცხადა, რომ "ქართული ოცნების" მიერ ტრამპის ადმინისტრაციაზე დამყარებული იმედები უსაფუძვლოა. ამით ის აშშ-ის მიერ დაწესებულ სავიზო შეზღუდვებს გამოეხმაურა.

დიმიტრი ცქიტიშვილის თქმით, ეს სანქციები ხელისუფლების მიერ მოპარულ არჩევნებზე პასუხია, ზეწოლის სახით. ის უფრო მკაცრს სანქციებსაც ელის.

"სანქციები ერთ-ერთი ნაწილია იმ საერთაშორისო ზეწოლის, რომელიც ხორციელდება ხელისუფლებაზე იმის გამო, რომ მოიპარა არჩევნები. ქვეყანაში სისტემური კრიზისია და ადამიანის უფლებების ფუნდამენტური დარღვევები. ეს ერთ-ერთი ნაწილია იმ დიდი გადაცდომა-დანაშაულის, რომელსაც ხელისუფლება ჩადის. შეგვიძლია ჩავთვალოთ, რომ ესეც ერთ-ერთი კომპონენტია. ეს განცხადება არ არის ერთადერთი და მასში ნათქვამია, რომ მხოლოდ ნაწილია და მიმდინარეობს მუშაობა დანარჩენზე. იქნება უფრო მკაცრი სანქციები, მაგნიტსკის სიაში კონკრეტული ადამიანების შეყვანა, რაც გვარების გამოცხადებას გულისხმობს, ვიზების შემთხვევაში, შეიძლება ეს არც გამოცხადდეს და ვერც გავიგოთ, ვინაა სიაში შეყვანილი. შეგვიძლია მხოლოდ ვივარაუდოთ, რომ მთელი მთავრობა და სხვა ოფიციალური პირები არიან, მაგრამ მაგნიტსკის სია უფრო ფუნდამენტური საკითხია.

[აშშ-ის] განცხადებაში არსად საქართველოს მთავრობა არაა ნახსენები, ოფიციალური პირები ნახსენებია მხოლოდ როგორც 'ქართული ოცნება;. რეალურად, მათ საკუთარი თავიც კრიზისში შეიყვანეს. სამწუხაროდ, სახელმწიფოც პოლიტიკურ და სისტემურ კრიზისშია, რაც გადაულახავია ასეთი ფორმებით, რასაც ქართული ოცნება ცდილობს. პროტესტის იგნორირება, თითქოს ეს მილევადია, კრიზისიდან არ გამოიყვანს ქვეყანას. შეიძლება, პროტესტმა სახე იცვალოს, მაგრამ იმ წინააღმდეგობაზე თვალის დახუჭვით და ზურგის შექცევით, რომელმაც აჩვენა, რომ მოსახლეობის დიდი ნაწილი არჩევნების შედეგებს არ აღიარებს და ჯიუტად ამბობს, რომ უსამართლოა ქვეყანაში მდგომარეობა, სიღრმისეული კრიზისი არ გვარდება, ანუ, ქვეყანაში მოსახლეობისგან მანდატი არ აქვს ხელისუფლებას, რომელსაც უნდა, რომ ეს ქვეყანა მართოს. პირველ რიგში, საქართველოს მოსახლეობის, მათი ჯიუტი პროტესტის დამსახურებით, საერთაშორისო თანამეგობრობამ, პრაქტიკულად ერთსულოვნად აღიარა, რომ ამ არჩევნების ლეგიტიმაცია არ შეიძლება იქნას აღიარებული“, — ამბობს ცქიტიშვილი.

ის გამოეხმაურა ქართული ოცნების იმ განაცხადსაც, რომ ტრამპის ინაუგურაციის შემდეგ საქართველოსა და აშშ-ს შორის ურთიერთობები გადაიტვირთება. მისი აზრით, ეს უსაფუძვლო მოლოდინია, რადგან ძველი და ახალი ადმინისტრაცია ერთმანეთთან კოორდინაციის გარეშე მნიშვნელოვან გადაწყვეტილებებს არ იღებს.

"მითია, რასაც ქართული ოცნება ამბობს, თითქოს ტრამპის ადმინისტრაციასთან 'ჩააწყობენ'. ასე არ ეწყობა ამერიკასთან. ამერიკას პროცედურული დემოკრატია აქვს. თუ სისტემამ ადამიანის უფლებების დარღვევა ცნო, პროცესი წარიმართება იმის მიუხედავად, ვინ იქნება ადმინისტრაციის ხელმძღვანელი. ტრამპის ადმინისტრაციის მოლოდინი არის მითი, რათა დრო მოიგონ, თავისიანები დაარწმუნონ, რომ ყველაფერი კარგადაა. სინამდვილეში, არაფერი არაა კარგად მათთვის. 20 იანვრისთვის ცდილობენ, ახალი რეალობა დაახვედრონ ტრამპის ადმინისტრაციას", — განაცხადა ცქიტიშვილმა.