სომხეთის მთავრობამ შეცვალა მთიანი ყარაბაღის დევნილი სომხებისთვის შეთავაზებული სოციალური დახმარების პროგრამა, შეამცირა ყოველთვიური დახმარება და ბენეფიციართა ჯგუფები და რესურსები საბინაო დახმარების პროგრამაზე გადაანაწილა, რასაც ბენეფიციარების კრიტიკა მოჰყვა.

ხუთშაბათს მიღებული გადაწყვეტილებით, დახმარების პაკეტი 2025 წლის აპრილიდან £50,000-დან ($130) ֏40,000-მდე ($100) შემცირდება, ივლისიდან — ֏30,000-მდე ($80).

ცვლილებები გავლენას მოახდენს მთიანი ყარაბაღის 18 წლამდე მოსახლეობაზე; მათზე, ვინც სავალდებულო განათლებას იღებს; 63 წელზე უფროსი ასაკის ოჯახებზე; ოჯახებზე, რომლებმაც დაკარგეს მთავარი მეურვე და ასევე — შეზღუდული შესაძლებლობის მქონე პირებზე. რაც მთლიანობაში დაახლოებით 54 000 ადამიანია.

დახმარების პროგრამა 2023 წლის ოქტომბერში, მას შემდეგ დაიწყო, რაც 100 000-ზე მეტმა სომეხმა, მთიანი ყარაბაღის აზერბაიჯანისთვის ჩაბარების შემდეგ, სახლები მიატოვა.

• გაიგეთ მეტი: მთიანი ყარაბაღიდან ბოლო ავტობუსი გავიდა

მას შემდეგ სომხეთმა 75 მილიარდზე მეტი (190 მილიონი აშშ დოლარი) დახარჯა დევნილი სომხების დახმარებისთვის, რომლის დაახლოებით 90% სახელმწიფო ბიუჯეტიდან გაიცემოდა. ცვლილებების შემდეგ, მთავრობა 2025 წელს მთლიანი პროგრამისთვის თითქმის ֏30.5 მილიარდს (78 მილიონი აშშ დოლარი) დახარჯავს.

მთავრობის სხდომაზე შრომისა და სოციალური დაცვის მინისტრმა, ნარეკ მკრტჩიანმა განაცხადა, რომ პროგრამის განახლების გადაწყვეტილება დევნილთა ეკონომიკური ინტეგრაციის ფინანსურ ტენდენციებს და 2024 წლის ივნისში საბინაო მხარდაჭერის სახელმწიფო პროგრამის დაწყებას ეფუძნება.

"ჩვენ ვხედავთ, რომ დევნილთა საკმაოდ დიდმა რაოდენობამ — დაახლოებით 25 000-მა ან მეტმა, იპოვა სამუშაო ან ეწეოდნენ სამეწარმეო საქმიანობას, რაც მნიშვნელოვანი რაოდენობაა 18-60 ასაკობრივ ჯგუფში. ამიტომ მიგვაჩნია, რომ სახელმწიფო მხარდაჭერა ეტაპობრივად უნდა იყოს მიმართული უფრო მიზანმიმართული და გრძელვადიანი გადაწყვეტილებებისთვის, განსაკუთრებით სახელმწიფო საბინაო დახმარების პროგრამის მიმართ", — განაცხადა მკრტჩიანმა.

საბინაო პროგრამა გააკრიტიკეს ზოგიერთმა ბენეფიციარმა, რომლებმაც დაადანაშაულეს მთავრობა მათი საჭიროებების განხილვაზე უარის თქმის გამო.

თავის მხრივ, პრემიერმინისტრმა ნიკოლ ფაშინიანმა ხუთშაბათს განაცხადა, რომ მისმა მთავრობის პოლიტიკამ "უნდა წაახალისოს მთიანი ყარაბაღის სომხები, იფიქრონ ოჯახის ხარჯების საკუთარი შრომით დაფარვაზე", რაც მათ ზოგად სტრატეგიაში ჯდება, რომ თანდათანობით გაუქმდეს ნებისმიერი სახის მხარდაჭერა.

"სიღარიბის დაძლევა შრომით შეიძლება", — დასძინა ფაშინიანმა.

მიღებულმა გადაწყვეტილებამ მთიანი ყარაბაღის სომხების უკმაყოფილება გამოიწვია.

ლიანა პეტროსიანმა, საზოგადო მოღვაწემ რეგიონიდან, ხაზგასმით აღნიშნა, რომ დახმარების პროგრამა არის "ყველაზე მნიშვნელოვანი მხარდაჭერა, რომელიც გაცემულია ქირის ხარჯებისთვის, რომელიც იძულებით გადაადგილებულებმა უნდა მიიღონ მანამ, სანამ არ ექნებათ საკუთარი სახურავი".

მან აღნიშნა, რომ საშუალოდ დასაქმებული ლტოლვილი ხელფასით ვერ დაფარავს ქირისა და ცხოვრების მაღალ ხარჯებს და ხაზგასმით აღნიშნა, რომ "ყველა დევნილი ითვლება დაუცველ ჯგუფად".

"განსხვავებების შემოღება, განსაკუთრებით მაშინ, როცა პარალელურად განხორციელებულმა საბინაო პროგრამამ არ გაამართლა, ჩემი აზრით, არარეალურია და უდავოდ გამოიწვევს დევნილთა უკმაყოფილების დიდ ტალღას", — დასძინა მან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.