Kaspersky რუსეთში დაარსებული კიბერუსაფრთხოების კომპანიაა, რომელიც ძირითადად თავისი ანტივირუსებითაა ცნობილი.

ბოლო დროის განმავლობაში, კომპანიის საქმიანობასთან დაკავშირებით, აშშ-ს არაერთმა სახელმწიფო სტრუქტურამ გამოთქვა ეჭვები. სავარაუდოა, რომ კომპანია მჭიდროდ თანამშრომლობს რუსეთის სპეცსამსახურებთან და ასევე მონაწილეობს რუსეთის მიერ განხორციელებულ სხვადასხვა კიბერშეტევებში.

სწორედ აღნიშნულ ფაქტთან დაკავშირებით, აშშ-ს ფედერალური საგამოძიებო ბიურო კომპანიებს ურჩევს, არ გამოიყენონ Kaspersky-ს ლაბორატორიის აპლიკაციები. აშშ-ს ოფიციალური სტრუქტურების განცხადებით, კომპანია თანამშრომლობს რუსეთის ხელისუფლებასთან და სპეცსამსახურებთან. შესაბამისად, შეუძლებელია ამერიკის სახელმწიფო სტრუქტურები იყენებდნენ Kaspersky-ს მიერ წარმოებულ ანტივირუსებსა თუ სხვა აპლიკაციებს.

თავის მხრივ, კომპანიის დირექტორი და დამფუძნებელი ევგენი კასპერსკი ყველა ბრალდებას უარყოფს და გამოთქვამს მზადყოფნას დაინტერესებულ სტრუქტურებს თავისი წარმოებული პროგრამების საწყისი კოდი გადასცეს. [Source Code]

ინტერნეტ გამოცემა cyberscoop-ის ინფორმაციით FBI-ის წარმომადგენლები მთელი წლის განმავლობაში მართავდნენ შეხვედრებს ამერიკულ კომპანიებთან და ურჩევდნენ მათ არ გამოეყენებინათ Kaspersky-ს აპლიკაციები. გამოცემის ინფორმაციით შეხვედრები მიმდინარეობდა ენერგეტიკულ სექტორში მომუშავე კომპანიებთან და ასევე ტექნოლოგიურ "გიგანტებთან".

cyberscoop-ის ინფორმაციით, ეს შეხვედრები სხვადასხვა შედეგებით მთავრდებოდა და FBI-ს რეკომენდაციებს, ძირითადად, ენერგეტიკულ სექტორში მომუშავე კომპანიები თანხმდებოდნენ, განსხვავებით ტექნოლოგიურ სფეროში მომუშავე კომპანიებისგან.

ივლისში აშშ-ს სენატმა მიიღო საწყისი დოკუმენტი, რომელიც უკრძალავს აშშ-ს თავდაცვის დეპარტამენტს Kaspersky-სთან თანამშრომლობას. ასევე, კონგრესმა ყველა სახელმწიფო უწყებას დაავალა Kaspersky-ის შესახებ მათ ხელთ არსებულ ინფორმაციის გამოქვეყნება.

Kaspersky-ს მიერ ივლისში გავრცელებულ განცხადებაში ნათქვამია, რომ არც კომპანიას და არც მის წარმომადგენლებს არ აქვთ კავშირი რუსეთის სახელმწიფო სამსახურებთან.

შეგახსენებთ, რომ თემა განსაკუთრებით აქტუალური მას შემდეგ გახდა, რაც "Bloomberg"-ის სტატია გამოქვეყნდა. გამოცემა ამტკიცებდა, რომ კომპანიის დირექტორი შეხვედრებს რუსული სპეცსამსახურების წარმომადგენლებთან მართავდა.

აღსანიშნავია, რომ Kaspersky-ის აპლიკაციას ამჟამადაც აშშ-ს თავდაცვის დეპარტამენტი იყენებს, თუმცა, სენატის გადაწყვეტილებით, მომავალი წლიდან, Kaspersky-ს პროდუქციას არცერთი სახელმწიფო უწყება აღარ გამოიყენებს.