თავისი ახალი ფილმის, The Substance-ს ფრანგული პრემიერისას და საფრანგეთის კინოთეკაში კარიერული ჯილდოს მიღებისას დემი მურმა ამერიკაში მიმდინარე არჩევნებზეც ისაუბრა. მსახიობმა ფილმის სიუჟეტი ამერიკაში მიმდინარე მოვლენებს დაუკავშირა.

"ამერიკა პურიტანებს, რელიგიურ ფანატიკოსებსა და კრიმინალებს ეყრდნობა. სწორედ ამას ვხედავთ ჩვენს არჩევნებშიც," — თქვა ოსკაროსანმა მსახიობმა კინოთეკის სცენაზე. "სექსუალობა ჩვენს ქვეყანაში მუდამ ტაბუდადებულია და სხეულის ირგვლივ მუდამ შიში ტრიალებს. მე ამის არასდროს მესმოდა. ვერასდროს ვიგებდი, რატომ შეგვიძლია სხეულზე საუბარი და მისი აღნიშვნა ხელოვნების სხვა დარგებში, თუმცა არა კინოში."

დემი მური ფილმში The Substance

ფოტო: Variety

"ჩემთვის, როგორც გარკვეული ასაკის ადამიანისთვის, სხვა ღირებულება ჰქონდა იმის ჩვენებას, რომ 20 და 30 წელს გადაცილებულები სხვადასხვა ნაკლის მქონე და არასრულყოფილი არსებები ვართ. ფილმი რისკიანი იყო, რადგან იმ ძალადობასა და სიმკაცრეს უსვამს ხაზს, რომლითაც ჩვენივე თავებს ვუყურებთ. The Substance-მა კომფორტის ზონიდან გამომიყვანა," — აღნიშნა დემი მურმა.

მისი თქმით, ამ ფილმის სცენარის დაწერას ასე იდეალურად მხოლოდ ქალი შეძლებდა — "ეს უკიდურესად პირადი კვლევის პროცესია. თუ მაყურებელს კორალი ფარჟეს ვიზუალური, სიმბოლური სტილი და ხმის გამოყენების გზები აოცებს, ეს იმიტომაა, რომ ქალებს ამ ყველაფრის გასაკეთებლად აქამდე დრო არ ჰქონიათ“.