შინაგან საქმეთა მინისტრის, ვახტანგ გომელაურმა მედიასთან თქვა, რომ შტურმის და შეტევის დროს, შსს-ს გაზის, წყლის და სხვა სპეცსაშუალებებიც ერთდროულად გამოყენება შეუძლია. შსს-ს მინისტრის განმარტებით, მან 2021 წელს პირადად გააუქმა 2015 წლის ბრძანება, რომელიც სპეცრაზმს ამას უკრძალავდა.

მინისტრის თქმით "გამოსაკვლევი და გამოსაძიებელია, რამდენად ავთენტურია (რაციის) ჩანაწერი", რომელიც "ნოდარ მელაძის შაბათის" მიერ გავრცელდა.

"ავთენტური იყო თუ არა ეს ჩანაწერი, საკითხავია და ალბათ, გამოსაძიებელია და სანახავია, ნამდვილი იყო თუ არა, აწყობილი იყო თუ არა. მივხედავთ მაგასაც. ეს ბრძანება გამოცემული იყო 2015 წელს, რომელიც შეიცვალა 2021 - გამოვიყენეთ პრაქტიკა ევროპული ქვეყნების, გერმანიის, საფრანგეთის, დიდი ქვეყნების, სადაც ჩვეულებრივად შეგიძლია გამოიყენო. სპეცრაზმს არ შეუძლია გამოიყენოს თუ არიან პატარა ბავშვები, არასრულწლოვანები, ფეხმძიმე ქალები და ა.შ. თუ ხდება შტურმი და შეტევა, შეგიძლია გამოიყენო ერთდროულად გაზიც, წყალიც და სხვა სპეცსაშუალებებიც. 2021 წელს ეს ცვლილება მე შევიტანე პირადად. ახალ ბრძანებაში წერია, რომ გაუქმებულია წინა 2015 წლის ბრძანება და შეიძლება გამოიყენო ერთდროულად წყალი და გაზი და არა მარტო ეს - ევროპაში იყენებენ საპოლიციო ძაღლებსაც აქციის დასაშლელად. ბოდიში ახლა და ცოცხლად წვავდნენ, პოლიციელებს თავები დაუტეხეს და ეგ შეიძლებოდა?!“, — განაცხადა შსს-ს მინისტრმა.

ამასთან, შსს-მ დაადასტურა ფაქტები და მტკიცებულებები, რომელიც ტვ პირველის" გამომძიებელი ჟურნალისტების მიერ გასაჯაროვდა. უწყებამ აღიარა, რომ აქციის მონაწილეების წინააღმდეგ წყლის ჭავლში ქიმიურ ნივთიერებებს აზავებდნენ.

ცნობისთვის, ტვ პირველმა ჩანაწერი მოიპოვა, რომლის მიხედვითაც ვიგებთ, რომ რუსული კანონის საწინააღმდეგო აქციების დროს შსს წყლის ჭავლში გარეულ ცრემლსადენ გაზს იყენებდა მოქალაქეების წინააღმდეგ.

"ნოდარ მელაძის შაბათში" გასული შსს-ს ჩანაწერის შემდეგ, ახალგაზრდა იურისტთა ასოციაციამ განცხადება გაავრცელა, სადაც სახელმწიფო უწყებას მოუწოდა გაასაჯაროოს შს მინისტრის N1002-ე ბრძანება და მიაწოდოს საზოგადოებას ინფორმაცია, შეიცვალა თუ არა ნორმა, რომელიც სამართალდამცავს უკრძალავდა აქტიური სპეციალური საშუალებების, მათ შორის, წყლის ჭავლის და ცრემლმდენი გაზის, ერთდროულად ან პარალელურ რეჟიმში გამოყენებას.

საია წერდა, რომ ცრემლმდენი გაზის, წყლის ჭავლის პარალელურად გამოყენება შს მინისტრის ბრძანებით აკრძალული იყო.