ღია მმართველობის პარტნიორობა (OGP) აშშ-ისა და ბრაზილიის პრეზიდენტების ერთობლივი ინიციატივით 8 ქვეყნის მთავრობის მიერ 2011 წლის 20 სექტემბერს გაეროს გენერალური ასამბლეის ფარგლებში დაფუძნდა.

OGP 77 წევრი ქვეყნის მთავრობასა და ათასობით სამოქალაქო საზოგადოების ორგანიზაციას აერთიანებს, რომლებიც ღია, ეფექტიანი და გამჭვირვალე მმართველობის დასამყარებლად მუშაობენ და ამ მიმართულებით ერთმანეთს გამოცდილებას უზიარებენ. ღია მმართველობის პარტნიორობის წევრთა რაოდენობა მზარდია, თუმცა საქართველოს მისი წევრობა დღეს შეუჩერდა. გაზაფხულზე OGP-მ მთავრობას მოუწოდა, კანონპროექტი [რუსული კანონი] უკან გაეწვია, წინააღმდეგ შემთხვევაში კი წევრობის შეჩერების შესაძლებლობას გაუსვა ხაზი.

ორ წელიწადში ერთხელ წევრი ქვეყნები OGP-ს წარუდგენენ სამოქალაქო სექტორთან თანამშრომლობით მომზადებულ სამოქმედო გეგმას, რომელშიც მთავრობის კონკრეტული ვალდებულებებია გაწერილი.

ღია მმართველობის პარტნიორობის პრიორიტეტთა შორის კორუფციასთან ბრძოლას, ციფრული მმართველობის გაძლიერებას, თავისუფალი სამოქალაქო სივრცის შექმნას, ჯანმრთელობის დაცვასა და სხვა არაერთ მნიშვნელოვან საკითხს ვხვდებით.

დაფუძნების დღიდან დღემდე გლობალურად, OGP-ის ფარგლებში, მთავრობებისა და სამოქალაქო საზოგადოების ერთობლივი ძალისხმევის შედეგად, 4000-ზე მეტი ღია მმართველობის რეფორმა განხორციელდა.

საქართველო OGP-ის წევრი 2012 წელს გახდა, 2014 წლიდან კი მმართველი კომიტეტის წევრი იყო. 2018 წელს ორგანიზაციის თავმჯდომარე ქვეყნის რანგში OGP-ის მე-5 გლობალურ სამიტს საქართველომ თბილისში უმასპინძლა. 2019 წელს წევრმა ქვეყნებმა საქართველო კიდევ ერთხელ აირჩიეს OGP-ის მმართველი კომიტეტის წევრად სამი წლის ვადით. შესაბამისად, შეიძლება ითქვას, რომ ერთ დროს საქართველო პარტნიორობის ლიდერიც კი იყო, თუმცა საქართველოს მთავრობის ქმედებებმა ეს რეალობა შეცვალა.