საქართველოს 2025 წლის სახელმწიფო ბიუჯეტის პროექტის თანახმად, მომავალ წელს ანტიკორუფციული ბიუროს ბიუჯეტი, 2024 წელთან შედარებით, 3 მილიონი ლარით გაიზრდება.

როგორც რადიო თავისუფლება წერს, ანტიკორუფციული ბიუროს ბიუჯეტის ზრდა რამდენიმე ფაქტორითაა განპირობებული — ბიუროში ამჟამად 86 ადამიანია დასაქმებული, მომავალი წლიდან კი დაგეგმილია 35 თანამშრომლის დამატება და შრომის ანაზღაურებისთვის ჯამში 900 ათასი ლარით მეტი გამოიყოფა. ამას გარდა, მომავალ წელს ბიუროს არაფინანსური აქტივების (შეიძლება იყოს უძრავი ქონება, ინტელექტუალური საკუთრება და სხვ.) 1,76 მილიონი ლარით ზრდა იგეგმება.

ანტიკორუფციული ბიუროს საქმიანობის ერთ-ერთი მიმართულება პოლიტიკური პარტიების, საარჩევნო სუბიექტისა და განცხადებული საარჩევნო მიზნის მქონე პირის ფინანსური საქმიანობის მონიტორინგია.

შეგახსენებთ, რომ 2 ოქტომბერს ანტიკორუფციული ბიუროს უფროსმა რაჟდენ კუპრაშვილმა გააუქმა მისივე გადაწყვეტილება, რომელიც საერთაშორისო გამჭვირვალობა-საქართველოს და აირჩიე ევროპას "განცხადებული საარჩევნო მიზნის მქონე" სუბიექტებად აცხადებდა.


1-ელ ოქტომბერს პრემიერ-მინისტრმა საჯაროდ მიმართა ანტიკორუფციული ბიუროს ხელმძღვანელს, რომ საერთაშორისო გამჭვირვალობა-საქართველოსა და სხვა ორგანიზაციებს "განცხადებული საარჩევნო მიზნის მქონე სუბიექტის" სტატუსი მოხსნოდათ, რის შემდეგაც რაჟდენ კუპრაშვილმა გადაწყვეტილება შეცვალა.