"თბილისობის" დღესასწაულთან დაკავშირებით, დედაქალაქის რამდენიმე ქუჩაზე სატრანსპორტო მოძრაობა ეტაპობრივად იზღუდება. ინფორმაციას თბილისის მერია ავრცელებს.

შეზღუდვები შემდეგ ლოკაციებს შეეხება:

1. ევროპის მოედანი და მეტეხის ხიდის მიმდებარე ტერიტორია

3 ოქტომბრის 01:00 საათამდე მოძრაობა ნაწილობრივ იზღუდება ევროპის მოედანზე და მეტეხის ხიდის ერთ მიმართულებაზე (ვახტანგ გორგასლის ქუჩიდან ევროპის მოედნისკენ). აღნიშნულ პერიოდში მეტეხის აღმართიდან, ღვინის აღმართიდან, კოტე აფხაზისა და ვახტანგ გორგასლის ქუჩებიდან ტრანსპორტი ევროპის მოედნისკენ ვერ გადაადგილდება.

საზოგადოებრივი ტრანსპორტი ღონისძიებების დასრულებამდე გორგასლის ქუჩიდან ბარათაშვილის ქუჩას დაუკავშირდება კოტე აფხაზის ქუჩის გავლით (ნაცვლად ევროპის მოედნის, მარცხენა სანაპიროსა და ბარათაშვილის ხიდისა).

3 ოქტომბრის 01:00 საათიდან 6 ოქტომბრის 08:00 საათამდე სატრანსპორტო მოძრაობა სრულად შეიზღუდება ევროპის მოედანზე, მეტეხის აღმართზე, მეტეხის ხიდზე, ღვინის აღმართსა და გვირაბიდან ამოსასვლელ პანდუსზე.

2. გიორგი ათონელის ქუჩა და მიმდებარე უბანი

8 ოქტომბრის 23:30 საათამდე საგზაო მოძრაობა სრულად იზღუდება პრეზიდენტის სასახლის წინ, გიორგი ათონელის ქუჩაზე (იტალიის ქუჩამდე) და ვახტანგ ორბელიანის შესახვევში.

მშრალი ხიდიდან და ჭანტურიას ქუჩიდან მომავალი ავტომობილებისთვის სანაპიროზე და ათონელის ქუჩის მიმართულებით გადაადგილებისთვის მოქმედებს შეცვლილი სქემა იტალიისა და სოლიკო ვირსალაძის ქუჩების გავლით.

3. აბანოთუბანი (აბანოსა და გრიშაშვილის ქუჩები)

6 ოქტომბრის 01:00 საათამდე საავტომობილო გადაადგილება იზღუდება აბანოს ქუჩის მონაკვეთზე (ვახტანგ გორგასლის ქუჩიდან იოსებ გრიშაშვილის ქუჩის კვეთამდე) და ასევე გრიშაშვილის ქუჩაზე აბანოს პირველ ჩიხამდე.

4. კოსტა ხეთაგუროვის ქუჩა

2 ოქტომბრის 12:00 საათიდან 5 ოქტომბრის 06:00 საათამდე მზადების და ღონისძიების პერიოდში ავტომობილების გადაადგილება დროებით შეიზღუდება კოსტა ხეთაგუროვის ქუჩაზე ("ვისოლის" ბენზინგასამართი სადგურიდან ხეთაგუროვისა და გურამ საღარაძის ქუჩების კვეთამდე) და შოთა გამცემლიძის ქუჩიდან ხეთაგუროვის მიმართულებით.

მუნიციპალური ტრანსპორტი ივანე ჯავახიშვილის ქუჩიდან ბარათაშვილის ხიდს მარცხენა სანაპიროს გავლით დაუკავშირდება (ნაცვლად კოსტა ხეთაგუროვის ქუჩისა).